ye kaisi aag barasti hai aasmaanon se — Kumar Pashi

"ek kahaani khatm hui hai ek kahaani baaqi hai main be-shak mismaar huun lekin meraa saani baaqi hai dasht-e-junun ki khaak uDaane vaalon ki himmat dekho TuuT chuke hain andar se lekin man-maani baaqi hai haath mire patvaar bane hain aur lahrein kashti meri zor havaa kaa qaaem hai dariyaa ki ravaani baaqi hai gaahe gaahe ab bhi chale jaate hain ham us kuche mein zehn buzurgi oDh chukaa dil ki naadaani baaqi hai kuchh ghazlein un zulfon par hain kuchh ghazlein un aankhon par jaane vaale dost ki ab ik yahi nishaani baaqi hai nai nai aavaazein ubhrin 'paashi' aur phir Duub gaiin shahr-e-sukhan mein lekin ik aavaaz puraani baaqi hai"

"apni to taqdir mein shab-bhar khaak uDaanaa hogaa hi yaar to saare bichhaD chale hain un kaa Thikaanaa hogaa hi din chaDh aayaa kyon nahin aae jaaein un se puchh aaein lekin un ke paas to ai dil koi bahaana hogaa hi aao chalein un ki mahfil mein aur apni sudh-budh kho dein aaj bhi yaaro un aankhon mein koi fasaana hogaa hi subh ko shab kah dete hain ham sach ko jhuuT bataate hain ham jaise sar-phiron se to naaraaz zamaana hogaa hi ai rangun mein chalti havaa meraa sandesa leti jaa teraa to un ki galiyon mein aanaa-jaanaa hogaa hi aaj milaa thaa 'paashi' se main vo bhi hai shaadaab bahut miri tarah us ke dil mein bhi gham kaa khazaana hogaa hi"

"havaa ke rang mein duniyaa pe aashkaar huaa main qaid-e-jism se niklaa to be-kanaar huaa sitaare TuuT ke taarikiyaan bikher gae ye hadisaa bhi safar mein hazaar baar huaa bulandiyon pe thaa mahv-e-safar huaa ki tarah libaas-e-khaak jo pahnaa to khaaksaar huaa lahuluhaan huaa bahr-o-bar kaa har manzar jo meri raah mein aayaa miraa shikaar huaa tamaam shahr ne mujrim mujhi ko gardaanaa tamaam shahr mein ik main hi sangsaar huaa"

"tiri shikast hai zaahir tiraa zavaal aTal yahi hai teraa muqaddar ki apni aag mein jal khataa ki tu ne ki yaaron ke qatl ki khvaahish sazaa ki apne janaaze ko khud uThaa kar chal kisi tarah se miTaa de ye naqsh-haa-e-yaqin kisi tarah se bhi is shahr-e-aarzu se nikal sitam ki TuuT rahaa hai tilism-e-harf-o-navaa fughaan ki bujhne lagi hai khayaal ki mashal 'elinaapaa' bhi nahin aur vo bevafaa bhi nahin sunaaein shahr mein 'paashi' kise ye taaza ghazal"

"miThi dhun mein gaa ke hamein bulaataa hai is mandir mein kaun bhagat ye subh-savere aataa hai is mandir mein pyaasi devi maang rahi hai rakt kaa pyaalaa bhagton se dekhein ab ke kaun surmaa jaataa hai is mandir mein unche aasan baiThne vaalaa unchi padvi paataa hai gire huon ko pagle kaun uThaataa hai is mandir mein yahaan to sab bahre baste hain devtaa hon yaa bhagat mahant kis ko apne dil kaa dard sunaataa hai is mandir mein patthar ne kab kis ko di hai man-chaahi bhikshaa batlaa kis ke aage haath apne phailaataa hai is mandir mein kaun yahaan aataa hai varna subh ko uTh kar jaldi mein hamein to bas ik but kaa ruup lubhaataa hai is mandir mein kaun sunegaa tere dukh ko hari hari ke kirtan mein kah kar kyon tu apni baat ganvaataa hai is mandir mein yahi samajhtaa hai ki ab bhagvaan usi ke bas mein hain jo bhi maathe tilak lagaa kar aataa hai is mandir mein vo jo khoyaa saa rahtaa hai naam hai jis kaa 'paashi' ji kyaa vo ab bhi shaam-savere aataa hai is mandir mein"

"duur kisi ko yaad aataa huun raat mujhe paagal karti hai ghar se duur nikal jaataa huun raat mujhe paagal karti hai ik anjaane shahr mein dekhun shakl koi jaani-pahchaani us ki or khinchaa jaataa huun raat mujhe paagal karti hai duur des ik ghar hai apnaa jaise koi ik sundar sapnaa sapne mein khud ko paataa huun raat mujhe paagal karti hai 'paashi' dil ko chain na aae gherein un ki yaad ke saae raat aae to ghabraataa huun raat mujhe paagal karti hai"

"is ishq-e-junun-khez mein kyaa kyaa nahin hotaa divaana hai jo qais se lailaa nahin hotaa kuchh hashr lahad par abhi barpaa nahin hotaa aae ho to Thahro koi zinda nahin hotaa kyuun kar ye kahun husn kaa nashsha nahin hotaa hotaa to bahut hai magar itnaa nahin hotaa kuchh kahiye to sharmaa ke jhukaa lete hain gardan bhule se bhi ab vaada-e-fardaa nahin hotaa milte hain vo dil surkh hui jaati hai chuTki naazuk hain bahut khun-e-tamannaa nahin hotaa deti hai mazaa mai kaa hamein talkhi-e-tauba jab haath mein paimaana-e-sahbaa nahin hotaa vo hashr ke din kushte ko Thukraa chuke sau-baar kuchh jaan si paD jaati hai zinda nahin hotaa boli ye tamannaa jo ruke vo dar-e-dil par ghar aap kaa hai aap se pardaa nahin hotaa tiron ko jagah dete hain jo siine mein apne un logon ke ai jaan kaleja nahin hotaa sahraa se qadam ghar ki taraf khaak uThaaun kaanTe se judaa paanv kaa chhaalaa nahin hotaa baiThe nazar aate hain vahi teri gali mein jin kaa kahin duniyaa mein Thikaanaa nahin hotaa furqat mein hai kyuun nazaa ki taklif gavaaraa mar jaaein 'riyaaz' aap se itnaa nahin hotaa"

"hai jo ik maa'raka faisal nahin hone detaa jin vo ho ke mujhe botal nahin hone detaa qatl ik roz hi kartaa huun isi goshe mein aur saabit ise maqtal nahin hone detaa zid hai us ki ki har ik shaakh ho phir sabz hi sabz garche paidaa koi konpal nahin hone detaa raushni apne khayaalon hi se karni hogi koi raushan kahin mash'al nahin hone detaa chun-ki miTTi ki bhi ek apni alag khushbu hai main kahin bhi ise sandal nahin hone detaa ik parinda ki jo sahtaa hai havaaon kaa dabaao aur parvaaz ko paidal nahin hone detaa Dar hai us ko nazar aae na kahin zehn kaa 'aks vo miraa aaina saiqal nahin hone detaa tiraa qaanun hai jangal kaa ghanimat hai ki tu mire is shahr ko jangal nahin hone detaa chalo baat us ki sunein ek 'ajab mantiq se jo kisi baat ko muhmal nahin hone detaa"

"muzhda ai zauq-e-asiri ki nazar aataa hai daam-e-khaali qafas-e-murgh-e-giraftaar ke paas jigar-e-tishna-e-aazaar tasalli na huaa ju-e-khun ham ne bahaai bun-e-har khaar ke paas mund gaiin kholte hi kholte aankhein hai hai khuub vaqt aae tum is 'aashiq-e-bimaar ke paas main bhi ruk ruk ke na martaa jo zabaan ke badle dashna ik tez saa hotaa mire gham-khvaar ke paas dahan-e-sher mein jaa baiThe lekin ai dil na khaDe ho jiye khubaan-e-dil-aazaar ke paas dekh kar tujh ko chaman bas-ki numu kartaa hai khud-ba-khud pahunche hai gul gosha-e-dastaar ke paas mar gayaa phoD ke sar 'ghaalib'-e-vahshi hai hai baiThnaa us kaa vo aa kar tiri divaar ke paas kab faqiron ko rasaai bu-e-mai-khvaar ke paas to bane bu dijiye maikhaane ki divaar ke paas"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"