Ghazal

"vaan jo kuchh kaabe mein asraar hai allaah allaah so mire but mein numudaar hai allaah allaah dair mein kaabe mein maikhaane mein aur masjid mein jalva-gar sab mein miraa yaar hai allaah allaah us ke har naqsh-e-qadam par karein aashiq sajda but-e-kaafir ki vo raftaar hai allaah allaah husn ke us ki kiyaa tur-e-tajalli dil ko haae kyaa jalva-e-didaar hai allaah allaah na gharaz kufr se na diin se ham ko matlab yaar se apne sarokaar hai allaah allaah shaikh hai tujh ko hi inkaar sanam mere se varna har shakhs ko iqraar hai allaah allaah khauf kyaa daghdagha-e-hashr se hai mujh ko 'muhib' pir-e-man haidar-e-karraar hai allaah allaah"

"udhar vo be-muravvat bevafaa be-rahm qaatil hai idhar be-sabr-o-be-taskin-o-be-taaqat miraa dil hai udhar sayyaad chashm-o-daam-e-zulf-o-naavak-e-mizhgaan idhar pahlu mein dil ik said-e-laaghar nim-bismil hai udhar us ko to mere naam se bhi nang hai har-dam idhar siine mein dil mushtaaq hai aashiq hai maail hai udhar vo khud-parast ayyaar hai maghrur hai khud-bēn idhar meraa dil az-khud-rafta hai shaidaai ghaafil hai udhar har roz kaa us ko khilaaf-e-vaada hai aasaan idhar shab-taa-sahar-gah intizaari sakht mushkil hai udhar khush sair-e-dariyaa se hai vo naa-aashnaa zaalim idhar ham gharq-e-bahr-e-gham hain aur naapaid saahil hai udhar barq-e-nigah hai sabr ke khirman ki aatish-zan idhar kisht-e-ummid-o-yaas ab tak sair-e-haasil hai udhar shaane ko us ke zulf-o-kaakul ne chaDhaayaa sar idhar dil par balaa-e-aasmaan yak-dast naazil hai udhar baaqi havas hai be-hisaab us ko jafaaon ki idhar likhiye vafaaon ki to kuchh apnaa hi faazil hai udhar vo aaine mein aks-e-ru apne kaa hai maail idhar har shai mein vo hai jalva-gar-e-shakl-o-shamaail hai udhar hai ikhtilaat aghyaar se us yaar-e-jaani kaa idhar dil zikr us ke kaa 'muhib' din raat shaamil hai"

"ai ham-damaan bhulaao na tum yaad-e-raftagaan vaamaandgaan ko hai yahi irshaad-e-raftagaan jo ghuncha naa-shagufta hi jhaD jaae shaakh se hai is chaman mein vo dil-e-naashaad-e-raftagaan chashm-o-dil-o-jigar ke liye ashk-e-dard-o-daagh ham paas hai ye tohfa-e-imdaad-e-raftagaan is kaarvaan-saraa mein ye baang-e-jaras nahin hai ye sadaa-e-naala-o-faryaad-e-raftagaan aasida-o-ravinda se puchhaa bahut 'muhib' daryaaft par na kuchh hui rudaad-e-raftagaan"

"tum jaante ho kis liye vo mujh se gayaa laD ai hamdam-e-man us ke kahin aur lagi laD us ne shajar-e-dosti ab dil se ukhaaDaa kahne se raqibon ke hai fitne ki bandhi jaD us but ko kahaan pahunchein but aazar ke taraashe haath apne se tayyaar kare jis ko khudaa ghaD dil-doz nigah yaar ki hoti hai muqaabil barchhi ki ani si mire siine mein gai gaD khajlat se tu phir saamne aankhein na karegaa ai abr mire girya ki jis vaqt lagi jhaD khat kaa ye javaab aayaa ki qaasid gayaa ji se sar ek taraf loTe hai aur ek taraf dhaD rindon ne evaz visme ke nuuraa jo lagaayaa paaki ki tarah shaikh ki daaDhi bhi gai jhaD tirchhi nigah us ki ki huaa koi na aaDe siine ko sipar kar ke rahe ek hamin aD sahraa-e-junun se 'muhib' us zulf ki zanjir phir pech mein le aai mujhe paanv mire paD"

"dekhtaa kuchh huun dhyaan mein kuchh hai hai yaqin kuchh gumaan mein kuchh hai sanam apne ko ham khudaa jo kahein kab qusur us ki shaan mein kuchh hai kuchh na dekhaa kisi makaan mein ham kahte hain laa-makaan mein kuchh hai tishna-e-khun hain laal-e-lab tere surkhi-e-rang-e-paan mein kuchh hai tere didaar ki havas ke sivaa dekh to meri jaan mein kuchh hai tu jo talvaar khinche hai mujh par zakhm bhi darmiyaan mein kuchh hai dekh to ab jafaa-kashi ki taab mujh dil-e-naa-tavaan mein kuchh hai dekh kar mujh ko nazaa mein tu ne na kahaa is javaan mein kuchh hai ham ko paTkaa zamin ke uupar gardish-e-aasmaan mein kuchh hai faaeda tujh ko ai za-khud ghaafil fikr-e-sud-o-ziyaan mein kuchh hai ye zamaana 'muhib' ba-qaul 'dard' aan mein kuchh hai aan mein kuchh hai"

"kaafir hue sanam ham din-daar teri khaatir tasbih toD baandhaa zunnaar teri khaatir gul sina-chaak bulbul naalaan chaman mein dekhi aankhon ke dukh se nargis bimaar teri khaatir abru ki tu ishaarat jis ki taraf kare thaa chalti thi mujh mein us mein talvaar teri khaatir main jhuuT sach bhi yak-dam aansu na un ke ponchhe jo chashm roz-o-shab hain khun-baar teri khaatir sab aashnaaon se ham begaana ho rahe the ab zindagi hai apni dushvaar teri khaatir masjid mein mai-kade mein kyaa kaifi aur suufi behosh teri khaatir hoshyaar teri khaatir jo raah-e-aashiqi mein thi pasti-o-bulandi vo ham ne ki saraasar hamvaar teri khaatir pathraa gai hain aankhein anjum ki tarah har shab bedaar rahte rahte ai yaar teri khaatir is abr mein chaman ne kyaa kyaa kiyaa hai saaqi asbaab mai-kashi kaa tayyaar teri khaatir har ghuncha hai gulaabi har gul hai saaghar-e-mai mai-khaana ho rahaa hai gulzaar teri khaatir aage to kucha-gardi sheva na thaa 'muhib' kaa ki ab shurua us ne naa-chaar teri khaatir"

"saath ghairon ke hai sadaa gaT-paT ik hamin se rakhe hai dil mein kapaT changul-e-baaz hain tiri mizhgaan taair-e-dil ko pal mein le hai jhapaT teri is vaz-e-dil-rubaai se ghar ke ghar ho gae hain chuD-chapaT vo bhi din phir dikhaaegaa allaah raat ko soe tu gale se lipaT paas jab ghair ko biThaataa hai jaae hai dil tire milaap se haT dete ho baat baat mein baazi ek ho apne kaam ke naT-khaT naaz ki tegh ghair par mat khinch dil hamaaraa kahin na jaave kaT jis tarah chaand par ho abr-e-siyaah zulf yuun mukhDe par rahi hai ulaT iid hai aaj aa gale mil lein dushmanon ki to jaae chhaati phaT gham mein tere hain ashk yuun jaari har ghaDi jis tarah chale hai rahaT ishq vo ghar hai jis ke shaah-o-gadaa baa-adab chumte rahe chaukhaT kulle-shai-in-muhit ki taqrir khaT se insaan ke hue parghaT dil-e-bechaara ik tan-e-tanhaa fauj-e-gham aae hai tamaam simaT dost ki ho madad to yak dam mein jaae ye maarka tamaam palaT yaan qadam raah par sivaae na rakh ai 'muhib' raah ishq ki hai bikaT"