Ghazal

"ye qarz to meraa hai chukaaegaa koi aur dukh mujh ko hai aur niir bahaaegaa koi aur kyaa phir yunhi di jaaegi ujrat pe gavaahi kyaa teri sazaa ab ke bhi paaegaa koi aur anjaam ko pahunchungaa main anjaam se pahle khud meri kahaani bhi sunaaegaa koi aur tab hogi khabar kitni hai raftaar-e-taghayyur jab shaam Dhale lauT ke aaegaa koi aur ummid-e-sahar bhi to viraasat mein hai shaamil shaayad ki diyaa ab ke jalaaegaa koi aur kab baar-e-tabassum mire honTon se uThegaa ye bojh bhi lagtaa hai uThaaegaa koi aur is baar huun dushman ki rasaai se bahut duur is baar magar zakhm lagaaegaa koi aur shaamil pas-e-parda bhi hain is khel mein kuchh log bolegaa koi honT hilaaegaa koi aur"

"ho jaaegi jab tum se shanaasaai zaraa aur baDh jaaegi shaayad miri tanhaai zaraa aur kyuun khul gae logon pe miri zaat ke asraar ai kaash ki hoti miri gahraai zaraa aur phir haath pe zakhmon ke nishaan gin na sakoge ye uljhi hui Dor jo suljhaai zaraa aur tardid to kar saktaa thaa phailegi magar baat is taur bhi hogi tiri rusvaai zaraa aur kyuun tark-e-taalluq bhi kiyaa lauT bhi aayaa? achchhaa thaa ki hotaa jo vo harjaai zaraa aur hai diip tiri yaad kaa raushan abhi dil mein ye khauf hai lekin jo havaa aai zaraa aur laDnaa vahin dushman se jahaan gher sako tum jitoge tabhi hogi jo paspaai zaraa aur baDh jaaeinge kuchh aur lahu bechne vaale ho jaae agar shahr mein mahngaai zaraa aur ik Dubti dhaDkan ki sadaa log na sun lein kuchh der ko bajne do ye shahnaai zaraa aur"

"patthar hain sabhi log karein baat to kis se is shahr-e-khamoshaan mein sadaa dein to kise dein hai kaun ki jo khud ko hi jaltaa huaa dekhe sab haath hain kaaghaz ke diyaa dein to kise dein sab log savaali hain sabhi jism barahna aur paas hai bas ek ridaa dein to kise dein jab haath hi kaT jaaein to thaamegaa bhalaa kaun ye soch rahe hain ki asaa dein to kise dein"

"ajab talaash-e-musalsal kaa ikhtitaam huaa husul-e-rizq huaa bhi to zer-e-daam huaa thaa intizaar manaaeinge mil ke divaali na tum hi lauT ke aae na vaqt-e-shaam huaa har ek shahr kaa meaar mukhtalif dekhaa kahin pe sar kahin pagDi kaa ehtiraam huaa zaraa si umr adaavat ki lambi fehristein ajiib qarz viraasat mein mere naam huaa na thi zamin mein vusat miri nazar jaisi badan thakaa bhi nahin aur safar tamaam huaa ham apne saath liye phir rahe hain pachhtaavaa khayaal lauT ke jaane kaa gaam gaam huaa"

"jivan ko dukh dukh ko aag aur aag ko paani kahte bachche lekin soe hue the kis se kahaani kahte sach kahne kaa hausla tum ne chhin liyaa hai varna shahr mein phaili viraani ko sab viraani kahte vaqt guzartaa jaataa aur ye zakhm hare rahte to baDi hifaazat se rakkhi hai teri nishaani kahte vo to shaayad donon kaa dukh ik jaisaa thaa varna ham bhi patthar maarte tujh ko aur divaani kahte tabdili sachchaai hai is ko maante lekin kaise aaine ko dekh ke ik tasvir puraani kahte teraa lahja apnaayaa ab dil mein hasrat si hai apni koi baat kabhi to apni zabaani kahte chup rah kar izhaar kiyaa hai kah sakte to 'aanas' ek alaahida tarz-e-sukhan kaa tujh ko baani kahte"

"vo kuchh gahri soch mein aise Duub gayaa hai baiThe baiThe nadi kinaare Duub gayaa hai aaj ki raat na jaane kitni lambi hogi aaj kaa suraj shaam se pahle Duub gayaa hai vo jo pyaasaa lagtaa thaa sailaab-zada thaa paani paani kahte kahte Duub gayaa hai mere apne andar ek bhanvar thaa jis mein meraa sab kuchh saath hi mere Duub gayaa hai shor to yuun uTThaa thaa jaise ik tufaan ho sannaaTe mein jaane kaise Duub gayaa hai aakhiri khvaahish puuri kar ke jiinaa kaisaa 'aanas' bhi saahil tak aa ke Duub gayaa hai"

"ik karb-e-musalsal ki sazaa dein to kise dein maqtal mein hain jiine ki duaa dein to kise dein patthar hain sabhi log karein baat to kis se is shahr-e-khamoshaan mein sadaa dein to kise dein hai kaun ki jo khud ko hi jaltaa huaa dekhe sab haath hain kaaghaz ke diyaa dein to kise dein sab log savaali hain sabhi jism barahna aur paas hai bas ek ridaa dein to kise dein jab haath hi kaT jaaein to thaamegaa bhalaa kaun ye soch rahe hain ki asaa dein to kise dein baazaar mein khushbu ke kharidaar kahaan hain ye phuul hain be-rang bataa dein to kise dein chup rahne ki har shakhs qasam khaae hue hai ham zahr bharaa jaam bhalaa dein to kise dein"

"vo mere haal pe royaa bhi muskuraayaa bhi ajiib shakhs hai apnaa bhi hai paraayaa bhi ye intizaar sahar kaa thaa yaa tumhaaraa thaa diyaa jalaayaa bhi main ne diyaa bujhaayaa bhi main chaahtaa huun Thahar jaae chashm-e-dariyaa mein laraztaa aks tumhaaraa bhi meraa saayaa bhi bahut mahin thaa parda larazti aankhon kaa mujhe dikhaayaa bhi tu ne mujhe chhupaayaa bhi bayaaz bhar bhi gai aur phir bhi saada hai tumhaare naam ko likkhaa bhi aur miTaayaa bhi"

"milan ki saaat ko is tarah se amar kiyaa hai tumhaari yaadon ke saath tanhaa safar kiyaa hai sunaa hai us rut ko dekh kar tum bhi ro paDe the sunaa hai baarish ne pattharon par asar kiyaa hai salib kaa baar bhi uThaao tamaam jivan ye lab-kushaai kaa jurm tum ne agar kiyaa hai tumhein khabar thi haqiqatein talkh hain jabhi to! tumhaari aankhon ne khvaab ko mo'atabar kiyaa hai ghuTan baDhi hai to phir usi ko sadaaein di hain ki jis havaa ne har ik shajar be-samar kiyaa hai hai tere andar basi hui ek aur duniyaa magar kabhi tu ne itnaa lambaa safar kiyaa hai mire hi dam se to raunaqein tere shahr mein thiin mire hi qadmon ne dasht ko rah-guzar kiyaa hai tujhe khabar kyaa mire labon ki khamoshiyon ne! tire fasaane ko kis qadar mukhtasar kiyaa hai bahut si aankhon mein tirgi ghar banaa chuki hai bahut si aankhon ne intizaar-e-sahar kiyaa hai"

"ye aur baat ki rang-e-bahaar kam hogaa nai ruton mein darakhton kaa baar kam hogaa taalluqaat mein aai hai bas ye tabdili mileinge ab bhi magar intizaar kam hogaa main sochtaa rahaa kal raat baiTh kar tanhaa ki is hujum mein meraa shumaar kam hogaa palaT to aaegaa shaayad kabhi yahi mausam tire baghair magar khush-gavaar kam hogaa bahut tavil hai 'aanas' ye zindagi kaa safar bas ek shakhs pe daar-o-madaar kam hogaa"

"baahar bhi ab andar jaisaa sannaaTaa hai dariyaa ke us paar bhi gahraa sannaaTaa hai shor thame to shaayad sadiyaan biit chuki hain ab tak lekin sahmaa sahmaa sannaaTaa hai kis se bolun ye to ik sahraa hai jahaan par main huun yaa phir gungaa bahraa sannaaTaa hai jaise ik tufaan se pahle ki khaamoshi aaj miri basti mein aisaa sannaaTaa hai nai sahar ki chaap na jaane kab ubhregi chaaron jaanib raat kaa gahraa sannaaTaa hai soch rahe ho socho lekin bol na paDnaa dekh rahe ho shahr mein kitnaa sannaaTaa hai mahv-e-khvaab hain saari dekhne vaali aankhein jaagne vaalaa bas ik andhaa sannaaTaa hai Darnaa hai to an-jaani aavaaz se Darnaa ye to 'aanis' dekhaa-bhaalaa sannaaTaa hai"

"kitne hi peD khauf-e-khizaan se ujaD gae kuchh barg-e-sabz vaqt se pahle hi jhaD gae kuchh aandhiyaan bhi apni muaavin safar mein thiin thak kar paDaav Daalaa to kheme ukhaD gae ab ke miri shikast mein un kaa bhi haath hai vo tiir jo kamaan ke panje mein gaD gae suljhi thiin gutthiyaan miri daanist mein magar haasil ye hai ki zakhmon ke Taanke ukhaD gae nirvaan kyaa bas ab to amaan ki talaash hai tahzib phailne lagi jangal sukaD gae is band ghar mein kaise kahun kyaa tilism hai khole the jitne qufl vo honTon pe paD gae be-saltanat hui hain kai unchi gardanein baahar saron ke dast-e-tasallut se dhaD gae"