Ghazal

ye to nahin ki baadiya-paimaa na aaegaa

ai dasht-e-aarzu koi ham saa na aaegaa

chalnaa nasib-e-zist hai yuun hi chale chalo

is raaste mein shahr-e-tamannaa na aaegaa

· · ·

har khauf har khatar se guzarnaa bhi sikhiye

jiinaa hai gar aziiz to marnaa bhi sikhiye

ye kyaa ki Duub kar hi mile saahil-e-najaat

sailaab-e-khun se paar utarnaa bhi sikhiye

· · ·

khvaabon kaa nashsha hai na tamannaa kaa silsila

ab rah gayaa hai bas gham-e-duniyaa kaa silsila

aabaad duur duur hain viraan se kuchh maqaam

ye bastiyaan hain yaa koi sahraa kaa silsila

· · ·

kho ke dekhaa thaa paa ke dekh liyaa

har tarah dil dikhaa ke dekh liyaa

phir khule ibtidaa-e-ishq ke baab

us ne phir muskuraa ke dekh liyaa

· · ·

ishq ki sai-e-bad-anjaam se Dar bhi na sake

ham tiri chashm-e-inaayat se utar bhi na sake

tu na miltaa magar allaah re mahrumi-e-shauq

jiine vaale tiri ummid mein mar bhi na sake

· · ·

ab tak ilaaj-e-ranjish-e-be-jaa na kar sake

ik umr mein bhi husn ko apnaa na kar sake

thi ek rasm-e-ishq so ham ne bhi ki adaa

duniyaa mein koi kaam anokhaa na kar sake

· · ·

chaand kaa raqs sitaaron kaa fusun maangti hai

zindagi phir koi andaaz-e-junun maangti hai

muddatein guzrin ki yakh-basta hue qalb-o-jigar

ghairat-e-ishq magar soz-e-darun maangti hai

· · ·

sab ik na ik saraab ke chakkar mein rah gae

kyaa pher aadmi ke muqaddar mein rah gae

kyaa dard-e-mushtarak thaa zamir-e-sukut mein

kho kar jo ham udaas se manzar mein rah gae

· · ·

jab ye daave the ki har dukh kaa mudaavaa ho gae

kis liye tum baais-e-khun-e-tamannaa ho gae

shauq kaa anjaam niklaa hasrat-e-aaghaaz-e-shauq

raaz ban jaane se pahle raaz ifshaa ho gae

· · ·

phulon ki talab mein thoDaa saa aazaar nahin to kuchh bhi nahin

khud aa ke jo uljhe daaman se vo khaar nahin to kuchh bhi nahin

ho din ki fazaaon kaa sargam yaa bhigti raaton kaa aalam

kitnaa hi suhaanaa ho mausam dildaar nahin to kuchh bhi nahin

· · ·

kaali ghazal suno na suhaani ghazal suno

mausam ye kah rahaa hai ki dhaani ghazal suno

jaagaa vo dard dil mein ki aansu nikal paDe

barsaa hai aaj TuuT ke paani ghazal suno

· · ·

kaam har zakhm ne marham kaa kiyaa ho jaise

ab kisi se koi shikva na gilaa ho jaise

umr-bhar ishq ko gham-dida na rakkhe kyunkar

haadisa vo ki abhi kal hi huaa ho jaise

· · ·

goyaa chaman chaman na thaa

aisaa ujaaD ban na thaa

khuun se tar ravish ravish

rang-e-gul-o-saman na thaa

· · ·

zamir-e-nau-e-insaani ke din hain

sadaaqat ki jahaanbaani ke din hain

tilism-e-subh-kaazib khud hi TuuTaa

tulua-e-subh-e-nuraani ke din hain

· · ·

maanaa apni jaan ko vo bhi dil kaa rog lagaaeinge

ahl-e-junun khud kyaa samjhe hain naaseh kyaa samjhaaeinge

shaayad ashk o aah se hi ab baar-e-alam kuchh halkaa ho

ham bhi kareinge shola-fishaani ham bhi lahu barsaaeinge

· · ·

zindagi khaak-basar shola-ba-jaan aaj bhi hai

tujh ko kho kar tujhe paane kaa gumaan aaj bhi hai

ek be-naam si uljhan hai dil-o-jaan pe muhit

ek gham naam saa ehsaas-e-ziyaan aaj bhi hai

· · ·

sab ki aankhon mein jo samaayaa thaa

kaun thaa vo kahaan se aayaa thaa

kis ne ki aaj pursish-e-ahvaal

koi apnaa thaa yaa paraayaa thaa

· · ·

bastiyaan luTti hain khvaabon ke nagar jalte hain

ham vahaan hain ki jahaan shaam-o-sahar jalte hain

dil ke aivaan mein afsurda charaaghon kaa dhuaan

duur kuchh duur vo yaadon ke khanDar jalte hain

· · ·

vaqt ghamnaak savaalon mein na barbaad karein

kuchh na kuchh sai-e-ilaaj-e-dil-e-naashaad karein

ishq ko husn ke atvaar se kyaa nisbat hai

vo hamein bhuul gae ham to unhein yaad karein

· · ·