Ghazal

kaarvaan ishq ki manzil ke qarin aa pahunchaa

khud mire dil mein mire dil kaa makin aa pahunchaa

mere har sajde se labbaik ki aavaaz aai

aastaan bhi to mire nazd-e-jabin aa pahunchaa

· · ·

aage vo jaa bhi chuke lutf-e-nazaara bhi gayaa

chashm-e-ghaflat na khuli subh kaa taaraa bhi gayaa

sard-mehri se tiri garmi-e-ulfat na rahi

dil mein uThtaa thaa jo har-dam vo sharaara bhi gayaa

· · ·

ye bandagi kaa sadaa ab samaan rahe na rahe

sar-e-niyaaz jhuke aastaan rahe na rahe

tire khayaal mein main huun mire khayaal mein tu

mire baghair tiri daastaan rahe na rahe

· · ·

agar meri jabin-e-shauq vaqf-e-bandagi hoti

to phir mahshur un ke saath apni zindagi hoti

jo tasvir-e-khyaali naqsh dil par ho gai hoti

to apni zaat mein har-dam tiri jalva-gari hoti

· · ·

masrur ho rahe hain gham-e-'aashiqi se ham

kyuun tang honge kashmakash-e-zindagi se ham

koh-e-alam uThaa hi liyaa raah-e-'ishq mein

apni khushi ko chhoD ke teri khushi se ham

· · ·

dil mein un kaa khayaal aataa hai

aur pahron mujhe rulaataa hai

bas tu hi tu hai har taraf maujud

koi aataa hai aur na jaataa hai

· · ·

tasavvuraat mein in ko bulaa ke dekh liyaa

zamaane bhar ki nazar se chhupaa ke dekh liyaa

fasaana-e-gham-e-furqat sunaa ke dekh liyaa

unhon ne sirf mujhe muskuraa ke dekh liyaa

· · ·

hasrat-e-did rahi diid kaa khvaahaan ho kar

dil mein rahte hain magar rahte hain armaan ho kar

vo mire paas hain ehsaas ye hotaa hai zarur

is qadar duur hain nazdik rag-e-jaan ho kar

· · ·

jabin-e-shauq par koi huaa hai mehrbaan shaayad

pae sajda bulaataa hai kisi kaa aastaan shaayad

dam-e-naza vo aae aur ziyaarat ho gai un ki

mukammal ho gai ab zindagi ki daastaan shaayad

· · ·

rah-e-vafaa mein unhin ki khushi ki baat karo

vo zindagi hain to phir zindagi ki baat karo

fughaan-e-nim-shabi ziist tak rahe qaaem

hayaat soz-e-jigar hai isi ki baat karo

· · ·