Ghazal

"hoshyaar kar rahaa hai gajar jaagte raho ai saahibaan-e-fikr-o-nazar jaagte raho dasht-e-shab-e-siyaah mein sunte hain shab-parast rokeinge kaarvaan-e-sahar jaagte raho zulmat kahin na kar de ujaale ko daagh-daar le kar charaagh-e-dida-e-tar jaagte raho soe nahin ki Duub gai nabz-e-kaaenaat bojhal ho laakh aankh magar jaagte raho khvaabida apne chaahne vaalon ko dekh kar mumkin hai lauT jaae sahar jaagte raho"

"shahr kaa shahr salibon se sajaa hai ab ke un ki aamad kaa har andaaz nayaa hai ab ke qaafila qaafila maqtal ki taraf jaaeinge log shokh pahle se bahut rang-e-hinaa hai ab ke ye to sach hai vo isi raah se guzreinge magar koi dekhe na inhein hukm huaa hai ab ke aao ji bhar ke gale mil lein rafiqo ham aaj qatl ki shakl mein inaam-e-vafaa hai ab ke mausam-e-gul tire sadqe tiri aamad ke nisaar dekh mujh se miraa saaya bhi judaa hai ab ke ek qatra nahin deti hai guzar jaati hai jo bhi uThti hai ghaTaa aisi ghaTaa hai ab ke dosto zikr-e-rukh-e-yaar se ghaafil na raho dasht-e-zulmaat mein mahtaab luTaa hai ab ke"

"dil ke har zakhm ko palkon pe sajaayaa to gayaa aap ke naam pe ik jashn manaayaa to gayaa mai-e-kohna na sahi khun-e-tamannaa hi sahi ek paimaana mire saamne laayaa to gayaa khair apnaa nahin baaghi hi samajh kar ham ko teri mahfil mein kisi taur bulaayaa to gayaa ab ye baat aur ki zindaan mein bhi zanjirein hain ham ko gulshan ki balaaon se bachaayaa to gayaa daar pe chaDh ke bhi khush hain ki hamein is dil mein is bahaane hi sahi apnaa banaayaa to gayaa ab ye qismat hi na jaage to kare kyaa koi roz-o-shab ik nayaa tufaan uThaayaa to gayaa kyaa hai manzil se agar ho gae ham duur 'akhtar' rahbaron ke hamein halqe se nikaalaa to gayaa"

"su-e-maqtal koi dam saath chale jis ko rakhnaa ho bharam saath chale isi hasrat mein kaTi raah-e-hayaat koi do-chaar qadam saath chale khaar-zaaron mein jahaan koi na thaa ban ke ham-dam tire gham saath chale ham se rindon kaa Thikaanaa kyaa hai tum kahaan shaikh-e-haram saath chale vaadi-e-shab ki kaThin raahon mein log katraa gae kam saath chale"

"dekho us ne qadam qadam par saath diyaa begaane kaa 'akhtar' jis ne ahd kiyaa thaa tum se saath nibhaane kaa aaj hamaare qadmon mein hai kaahkashaan shahr-e-mahtaab kal tak log kahaa karte the khvaab use divaane kaa tere lab-o-rukhsaar ke qisse tere qad-o-gesu ki baat saamaan ham bhi rakhte hain tanhaai mein dil bahlaane kaa tum bhi sunte to ro dete ham bhi kahte to rote jaan ke ham ne chhoD diyaa hai ik hissa afsaane kaa kuchh to hai jo apnaayaa hai ham ne ku-e-malaamat ko vaise aur tariqa bhi thaa 'akhtar' dil bahlaane kaa"

"dil mein Tisein jaag uThti hain pahlu badalte vaqt bahut apnaa zamaana yaad aataa hai suraj Dhalte vaqt bahut vo parcham vo sar ke turre aur vo safine apne the jin ko dekh ke sho'le bhi roe the jalte vaqt bahut un shishon ke rezon kaa marham hai apne zakhmon par lamha lamha jo TuuTe talvaarein chalte vaqt bahut pal bhar mein paani hote dekhe hain sanam kirdaaron ke ham kaise kah dein lagtaa hai sang pighalte vaqt bahut suune kitne baam hue kitne aangan be-nur hue chaand se chehre yaad aate hain chaand nikalte vaqt bahut ab har ghar ki chaukhaT ham par hansti hai to raaz khulaa phuuT phuuT kar roi thiin kyuun dahlizein chalte vaqt bahut do naslon ki kashti thi vo pichhle dinon jo Duub gai bhige jismon vaalo lagegaa tum ko sanbhalte vaqt bahut"

"raunaq hi nahin us ki ham ruh-o-ravaan bhi hain lekin hamein duniyaa ki khaatir pe garaan bhi hain ik tere hi kuche par mauquf nahin hai kuchh har gaam hain taazirein ham log jahaan bhi hain gulchin ko nahin shaayad is raaz se aagaahi shabnam mein nahaae gul shoalon ki zabaan bhi hain khaate the qasam jin ke kirdaar-o-amal ki ham shaamil saf-e-aadaa mein vo ham-nafasaan bhi hain sach kahte ho ham aise zarron ki haqiqat kyaa ab kaun kahe tum se ham sang-e-giraan bhi hain"

"kisi kaa chehra kisi par sajaa nahin detaa kabhi fareb koi aaina nahin detaa hasad kaa rang pasandida rang hai sab kaa yahaan kisi ko koi ab duaa nahin detaa ik e'timaad thaa baaqi so uTh gayaa vo bhi ki bhaai bhaai ke ghar kaa pataa nahin detaa bujhaae jab se hamaare charaag logon ne koi darakht hamein ab havaa nahin detaa hamein khudaa pe bharosa hai naa-khudaa pe nahin khudaa jo detaa hai vo naa-khudaa nahin detaa"

"ab dard kaa suraj kabhi Dhaltaa hi nahin hai ab dil koi pahlu ho sanbhaltaa hi nahin hai bechain kiye rahti hai jis ki talab-e-did ab baam pe vo chaand nikaltaa hi nahin hai ik 'umr se duniyaa kaa hai bas ek hi 'aalam ye kyaa ki falak rang badaltaa hi nahin hai naakaam rahaa un ki nigaahon kaa fusun bhi is vaqt to jaadu koi chaltaa hi nahin hai jazbe ki kaDi dhuup ho to kyaa nahin mumkin ye kis ne kahaa sang pighaltaa hi nahin hai"