Ghazal

junun kaar-farmaa huaa chaahtaa hai

qadam dasht paimaa huaa chaahtaa hai

dam-e-girya kis kaa tasavvur hai dil mein

ki ashk ashk dariyaa huaa chaahtaa hai

· · ·

khubiyaan apne mein go be-intihaa paate hain ham

par har ik khubi mein daagh ik aib kaa paate hain ham

khauf kaa koi nishaan zaahir nahin afaaal mein

go ki dil mein muttasil khauf-e-khudaa paate hain ham

· · ·

kabk o qumri mein hai jhagDaa ki chaman kis kaa hai

kal bataa degi khizaan ye ki vatan kis kaa hai

faisla gardish-e-dauraan ne kiyaa hai sau baar

marv kis kaa hai badakhshaan o khutan kis kaa hai

· · ·

kah do koi saaqi se ki ham marte hain pyaase

gar mai nahin de zahr hi kaa jaam balaa se

jo kuchh hai so hai us ke taghaaful ki shikaayat

qaasid se hai takraar na jhagDaa hai sabaa se

· · ·

dil ko dard-aashnaa kiyaa tu ne

dard-e-dil ko davaa kiyaa tu ne

tab-e-insaan ko di sirisht-e-vafaa

khaak ko kimiyaa kiyaa tu ne

· · ·

vaan agar jaaein to le kar jaaein kyaa

munh use ham jaa ke ye dikhlaaein kyaa

dil mein hai baaqi vahi hirs-e-gunaah

phir kiye se apne ham pachhtaaein kyaa

· · ·

haqiqat mahram-e-asraar se puchh

mazaa angur kaa mai-khvaar se puchh

vafaa aghyaar ki aghyaar se sun

miri ulfat dar o divaar se puchh

· · ·

baat kuchh ham se ban na aai aaj

bol kar ham ne munh ki khaai aaj

chup par apni bharam the kyaa kyaa kuchh

baat bigDi bani banaai aaj

· · ·

go javaani mein thi kaj-raai bahut

par javaani ham ko yaad aai bahut

zer-e-burqaa tu ne kyaa dikhlaa diyaa

jama hain har su tamaashaai bahut

· · ·

dhuum thi apni paarsaai ki

ki bhi aur kis se aashnaai ki

kyuun baDhaate ho ikhtilaat bahut

ham ko taaqat nahin judaai ki

· · ·

jiite ji maut ke tum munh mein na jaanaa hargiz

dosto dil na lagaanaa na lagaanaa hargiz

ishq bhi taak mein baiThaa hai nazar-baazon ki

dekhnaa sher se aankhein na laDaanaa hargiz

· · ·

koi mahram nahin miltaa jahaan mein

mujhe kahnaa hai kuchh apni zabaan mein

qafas mein ji nahin lagtaa kisi tarah

lagaa do aag koi aashiyaan mein

· · ·

dil se khayaal-e-dost bhulaayaa na jaaegaa

siine mein daagh hai ki miTaayaa na jaaegaa

tum ko hazaar sharm sahi mujh ko laakh zabt

ulfat vo raaz hai ki chhupaayaa na jaaegaa

· · ·

haq vafaa ke jo ham jataane lage

aap kuchh kah ke muskuraane lage

thaa yahaan dil mein taan-e-vasl-e-adu

uzr un ki zabaan pe aane lage

· · ·

ishq ko tark-e-junun se kyaa gharaz

charkh-e-gardaan ko sukun se kyaa gharaz

dil mein hai ai khizr gar sidaq-e-talab

raah-rau ko rah-numon se kyaa gharaz

· · ·

hashr tak yaan dil shakebaa chaahiye

kab milein dilbar se dekhaa chaahiye

hai tajalli bhi naqaab-e-ru-e-yaar

us ko kin aankhon se dekhaa chaahiye

· · ·

main to main ghair ko marne se ab inkaar nahin

ik qayaamat hai tire haath mein talvaar nahin

kuchh pataa manzil-e-maqsud kaa paayaa ham ne

jab ye jaanaa ki hamein taaqat-e-raftaar nahin

· · ·

ghar hai vahshat-khez aur basti ujaaD

ho gai ek ik ghaDi tujh bin pahaaD

aaj tak qasr-e-amal hai naa-tamaam

bandh chuki hai baar-haa khul khul ke paaD

· · ·

hai ye takiya tiri ataaon par

vahi israar hai khataaon par

rahein naa-aashnaa zamaane se

haq hai teraa ye aashnaaon par

· · ·

ranj aur ranj bhi tanhaai kaa

vaqt pahunchaa miri rusvaai kaa

umr shaayad na kare aaj vafaa

kaaTnaa hai shab-e-tanhaai kaa

· · ·

ab vo aglaa saa iltifaat nahin

jis pe bhule the ham vo baat nahin

mujh ko tum se e'timaad-e-vafaa

tum ko mujh se par iltifaat nahin

· · ·

buri aur bhali sab guzar jaaegi

ye kashti yunhi paar utar jaaegi

milegaa na gulchin ko gul kaa pataa

har ik pankhuDi yuun bikhar jaaegi

· · ·

gham-e-furqat hi mein marnaa ho to dushvaar nahin

shaadi-e-vasl bhi aashiq ko sazaa-vaar nahin

khub-rui ke liye zishti-e-khu bhi hai zarur

sach to ye hai ki koi tujh saa tarah-daar nahin

· · ·

us ke jaate hi ye kyaa ho gai ghar ki surat

na vo divaar ki surat hai na dar ki surat

kis se paimaan-e-vafaa baandh rahi hai bulbul

kal na pahchaan sakegi gul-e-tar ki surat

· · ·