Ghazal

"jo log aap se baDaa hi pyaar rakh chuke qadmon pe aap un ki hi dastaar rakh chuke tum bijliyaan rakho to rakho husn ki yahaan ham bhi taraazu mein ye dil-e-zaar rakh chuke 'aashiq jo sar-phire se tumhein lag rahe hain ab dil mein dabaa ke vo kai asraar rakh chuke jis aag se hai raushni duniyaa mein aaj bhi siine mein qaid vo sabhi fankaar rakh chuke"

"ye zindagi tamaam bitaa di hai pyaas mein phir kyon har ek raat bitaate hain aas mein sab yaar sochte the rahegaa vahi samaan ik main hi bas bachaa huun koi sau pachaas mein main ghol kar ke pi gayaa huun zindagi ko yuun puuri kitaab bas gai hai iqtibaas mein ham ne bhi to nikaale hain naasur kaaT kar ham ne bhi din guzaare hain kaale libaas mein tum jaam maangte ho baDi chhoTi chiiz hai main dhaDkanein rakhun jo kaho is gilaas mein kaise 'amaan' ab ye sudhar jaaein 'aadatein ham ne bitaae din hain kharaabon ke paas mein"

"is daur-e-muflisi kaa ham ne 'ilaaj dekhaa saare sukhanvaron ko aashiq-mizaaj dekhaa mahtaab dekhtaa thaa main ghar ki khiDkiyon se mahtaab ne dariche se mujh ko aaj dekhaa paT bhi sabhi khule hain darbaan bhi nahin hai is bazm kaa alag hi rasm-o-rivaaj dekhaa aaj aakhiri dafa thaa paani se peT bharnaa bachchon ne aaj jaa ke ghar mein anaaj dekhaa sach ki Dagar pe jab bhi rakkhe qadam kisi ne pahle to dekhi ghurbat phir takht-o-taaj dekhaa"

"qaid se baahar main aanaa chaahtaa huun aaj phir se muskuraanaa chaahtaa huun raat ho kitni hi kaali khatm hogi is ghazal mein ye bataanaa chaahtaa huun main bhale bebas huun lekin tu nahin hai phir tiri chaukhaT pe aanaa chaahtaa huun kaash mil jaaein puraane yaar phir se phir puraane giit gaanaa chaahtaa huun main ne apni jaan ki baazi lagaa di haar kar tujh ko haraanaa chaahtaa huun jaa nikal jaa 'ishq ab tu dil se mere tujh se main pichhaa chhuDaanaa chaahtaa huun ab na ghar TuuTe kisi 'aashiq kaa maulaa main bas apnaa ghar basaanaa chaahtaa huun"

"is gham-e-dil kaa koi siraa hi nahin raah-e-manzil kaa koi siraa hi nahin saans ukhaDne lagi dil bhi naa-saaz hai daur-e-mushkil kaa koi siraa hi nahin tum bhale chhoD jaaoge mujh ko sanam 'ishq-bismil kaa koi siraa hi nahin main rafiqon mein baiThaa huaa huun magar fikr-e-qaatil kaa koi siraa hi nahin ye 'azaabon mein bhi DhunDh legaa khushi himmat-e-dil kaa koi siraa hi nahin"

"akelaa jo rahaa har dam kisi kaa ho nahin saktaa bhale ho mustaqil gardish magar vo ro nahin saktaa hasin itni hai tu zauq-e-nazar to ban gayaa huun main magar dil ki kiyaari mein nayaa kuchh bo nahin saktaa sanbhal jaa dil ye kyaa sapne bune jaataa hai tu din-raat milegaa kyaa tujhe vo soch kar jo ho nahin saktaa main apni be-qaraari kaa tujhe 'aalam bataaun kyaa badaltaa huun main karvaT raat-bhar ab so nahin saktaa kahaa jo krishn ne giitaa mein rakkhegaa agar tu yaad bhale jitnaa ghanaa jangal ho par tu kho nahin saktaa"

"nikhat-e-gul aaj-kal mujh ko sataati hai bahut ek laDki khvaab mein aa kar jagaati hai bahut ek til jo gaal par hai mo'jiza saa hai koi aabshaaron jaisi us ki zulf bhaati hai bahut hain khutut-e-jism mein taare jaDe jaise kai vo hasin jaan-o-jigar mujh ko lubhaati hai bahut vo agar hans de to main likh duun qaside chaand tak 'ishq karne kaa saliqa vo sikhaati hai bahut ai 'amaan' ab kyaa karun us ko manaane ke liye ruuTh kar mujh se vo meraa dil jalaati hai bahut"