Ghazal

"jahaan-e-rang-o-bu mein thi ye viraani magar kab tak hamaare pyaar ki khushbu na pahunchi thi yahaan jab tak tumhaari maslahat-koshi ko hai meraa salaam ai dil unhein chaahaa unhein puujaa magar dekhaa kahaan ab tak azal ki pyaas honTon par liye phirtaa rahaa naadaan uThaayaa jaam kitnon ne zi-bas pahunchaa kisi lab tak chalo achchhaa huaa tum ne to saare daagh dho Daale mire daaman pe ye dhabbaa rahegaa zau-fishaan kab tak khamoshi ne miri kyaa kah diyaa tujh se ki ai dauraan thame aansu na shabnam ke garebaan-chaak gul kab tak ghalat hai tujh se ummid-e-vafaa ai fitna-e-dauraan yunhi baaqi hain hangaame rahe tu mehrbaan jab tak 'anis' is kaifiyat mein ye ghazal likhnaa qayaamat hai lagegi aag jab dil mein to pahunchegaa dhuaan lab tak"

"fareb-e-zaat ke dilkash buton ko kis ne yuun toDaa hamin the jis ne hasti ke haqaaeq se na munh moDaa dar-e-hasrat ye kyaa taktaa hai ai dil nau-ba-nau jalve kisi ki sarfaraazi dekh kar kariye na dil thoDaa ye gham kyaa kam hai ai hamdam ki basti ke ghazaalon ko abhi dasht-e-taghaaful ki tamannaa ne nahin chhoDaa nai divaar uThaa kar ham ye samjhe dil badal Daale magar buniyaad ke patthar ne vo rishta nahin toDaa muqaddar se shikaayat kab talak kariye 'anis' aakhir tumhein paas-e-takalluf ne kisi qaabil nahin chhoDaa"

"chaman chaman mein hain barpaa ye kaise hangaame kali ke titli ke bhaunron ke gul ke hangaame hazaar rang ke phulon se baagh ki zinat bahaar aai to laai hai itne hangaame miri khamoshi ke maa'ni kuchh aur hi samjhe isi liye to uThaae hain itne hangaame vo raah bhuul chuke the main bach ke kyaa karti miri gali mein magar kis qadar the hangaame hui tujhe kabhi ai dil maaal ki parvaah har ek saans ki dhaDkan mein kitne hangaame zaraa pata to lagaa nafraton ke saudaagar uThe hain kaun gali se machaae hangaame hamaari be-khabari hai sazaa hamaare liye andheri raahon mein ugte hain saare hangaame gham-e-hayaat se bachne ke sau bahaane hain aziz-tar hain mujhe zindagi ke hangaame hazaar baar mujhe DhunD kar palaT aae hain kitne zarf-e-nazar shahr ke ye hangaame ye dil ki dast-e-talab kar sakaa kabhi na daraaz na bhuul paayaa kabhi aarzu ke hangaame 'anis' tum ne basaae hain dil ki dhaDkan mein takhayyulaat ke aanchal se le ke hangaame"

"raah kaa har khaar ik din gulsitaan ban jaaegaa zarra zarra khaak kaa phir aasmaan ban jaaegaa nafratein miT jaaeingi harf-e-ghalat ki tarah se haan magar harf-e-ghalat ik daastaan ban jaaegaa bin kahe vo dil ki baatein jaan jaaeinge zarur har-bun-e-mu ek din nok-e-zabaan ban jaaegaa sirf khaakistar nahin hain jaa-ba-jaa chingaariyaan TuTtaa taaraa bhi ik din kahkashaan ban jaaegaa dekhnaa hai khvaab dekho bas isi aiqaan ke saath uThne vaalaa har qadam taaza jahaan ban jaaegaa"

"vo yaqin phir kisi chehre pe nazar aaegaa jo mire khvaab ki taabir sunaa jaaegaa jhiil si aankhon mein khil jaaein umidon ke kanval jin se ye mehr-e-jahaan-taab bhi sharmaaegaa phir likhi jaaegi in chaand se chehron ki kitaab vaqt safhaat palaTtaa huaa rah jaaegaa dard ki shab hai guzar jaaegi pal-do-pal mein ik sitaara sar-e-mizhgaan jo Thahar jaaegaa qahr dhaate hain miri zaat pe sarkash lamhe gar mudaavaa na kiyaa hausla pachhtaaegaa zer-e-khanjar bhi mujhe yaad rahegaa vo shakhs jo miri laash ko apnaa adu Thahraaegaa shaayad is baat kaa ilzaam mujhi par aae gar kabhi koi moarrikh ise dohraaegaa"

"meraa maazi mire chehre se jhalaktaa hai zarur mujh ko haalaat ki garmi ki shikaayat na ghurur maslahat jaan ke kaanTon ki qabaa laae the gul ki rangin-qabaai ko parakhnaa thaa zarur kaun se bhes mein mil jaaein farishte hamdam khidmat-e-ins-o-bashar apnaa fariza hai huzur vaqt ke saath badalne lagaa ehsaas kaa rang mujh ko is baat kaa pahle se na thaa koi shuur baarhaa un ko rag-e-jaan se qarin paayaa hai phir jo dekhaa to nazar aate hain vo aaj bhi duur aap be-vajh 'anis' aaj pareshaan na hon ab kahaan yaad unhein vo dil-e-saada kaa qusur"

"jagmagaate shahr ki raanaaiyon mein kho gayaa thaa vo suraj saa magar parchhaaiyon mein kho gayaa aane vaale vaqt ne samjhaa use apnaa naqib vo par-e-parvaaz kyon pahnaaiyon mein kho gayaa meraa chehra apne pas-manzar se khud vaaqif na thaa bhiiD mein to saath thaa tanhaaiyon mein kho gayaa haal ke maatam-saraa hain ham na maazi ke naqib apnaa mustaqbil magar parchhaaiyon mein kho gayaa pattharon ke Dher par rakh kar chali aai use maamtaa kaa dard kyon rusvaaiyon mein kho gayaa apne aanchal se koi parcham banaa paai na vo jazba-e-be-ikhtiyaar angnaaiyon mein kho gayaa shaam se pahle sameTi zard patton ne bisaat mausamon kaa dard in raanaaiyon mein kho gayaa"

"yuun fasaana kahne kaa silsila badal jaae agle moD par shaayad raasta badal jaae aaina badalne se chehra kab badaltaa hai haan ye ain mumkin hai zaaviya badal jaae log mere baare mein kuchh alag hi kahte hain mujh se mil ke dekhein to nazriya badal jaae garche lafz-o-maani kaa rishta khud hi mubham hai vo agar bayaan kar dein vaaqia badal jaae dushmanon se milne kaa faisla to meraa thaa aap se milein shaayad faisla badal jaae baat kahte kahte kyon ruk gaiin adhar mein tum soch kar kaho shaayad silsila badal jaae baarhaa 'anis' un se mil ke yuun to dekh aae ab ki baar mumkin hai nazriya badal jaae"

"ba-roz-e-hashr miraa ehtisaab kyaa hogaa ki is zamin ke sivaa aur azaab kyaa hogaa mudaam fikr mein be-aql kaa tasalsul-e-kaar kitaab-e-zist kaa aainda baab kyaa hogaa javaan dilon mein faqat nafratein hi milti hain ziyaada is se koi inqalaab kyaa hogaa ataa kiyaa mah-e-kaamil ko ishraton kaa ghurur andheri raat se baDh kar azaab kyaa hogaa tilism-e-kaif-o-nazar muddaaa-e-be-khabari tilism-e-hosh-o-khirad kaa nisaab kyaa hogaa gunaahgaar nazar bhi hai dil ki dhaDkan bhi vo puchh leinge to meraa javaab kyaa hogaa ba-faiz-e-jurat-e-rindaana dekhnaa to 'anis' adaa-shanaason kaa tujh par itaab kyaa hogaa"