Ghazal

"naa-karda gunaahon ki sazaa jhel rahe hain yuun lagtaa hai ghairon kaa kiyaa jhel rahe hain parvarda-e-vahshat hain magar vaqt ke haathon ik 'umr se shaadaab fazaa jhel rahe hain dil ab bhi tiri or se bad-zan nahin hotaa muddat se tiraa harf-e-du'aa jhel rahe hain kyaa un ki khataaon pe bhi imkaan-e-sazaa hai chup-chaap jo qismat kaa likhaa jhel rahe hain zindaan ki dahliz pe baiThe hue qaidi aazaad-khayaali ki sazaa jhel rahe hain ye daur-e-judaai to bahut sakht hai lekin hai aap ki hasrat to bajaa jhel rahe hain us shakhs se hai dil ko tasalli ki umidein jis ko ye khabar bhi nahin kyaa jhel rahe hain"

"dida-o-dil ko tiri zaat mein zam karte hain qais se ho na sakaa kaam jo ham karte hain chaaraagar koi na munis na masihaa koi kaam bas aap ke ye dast-e-karam karte hain ham kaTe haathon se likkheinge vafaa ke maa'ni shukriya aap kaa jo haath qalam karte hain raat jab khvaab ki taa'bir talab karti hai subh aavaaz ye deti hai ki ham karte hain ham jo karte the khudaa hone kaa daa'vaa kal tak khud ko ab mo'tarif-e-dair-o-haram karte hain"

"pa-e-taslim-o-razaa kham bhi to ho saktaa hai jo nigun sar hai vo rustam bhi to ho saktaa hai aankh nam hai to zaruri nahin koi gham ho phuul par qatra-e-shabnam bhi to ho saktaa hai ham bahaaron mein phirein aur khizaan-gir rahein yaar vahshat kaa ye 'aalam bhi to ho saktaa hai dar se Takraataa huaa sard havaa kaa jhonkaa kisi bimaar kaa marham bhi to ho saktaa hai zehn hai paa-ba-rikaab-e-khatar-e-aainda tujh se milne pe mujhe gham bhi to ho saktaa hai kisi mazlum ki naa-gufta sadaa kaa lahja hila-e-shaah se mohkam bhi to ho saktaa hai"

"malul rahne de 'aadat miri bigaaD nahin ai zindagi mire zakhmon se chheD-chhaaD nahin kisi pe khul nahin saktaa mire vujud kaa rang main vo makaan huun jis mein koi kivaaD nahin hamaare qahqahe vahshat ke tarjumaan Thahre hamaari zaat se baDh kar koi ujaaD nahin khirad ke shahr mein kaar-e-junun kiyaa jaae ye kaarobaar vo hai jis mein bhiD-bhaaD nahin ye kyaa sitam hai rah-e-vasl bhi nahin mumkin tumhaari yaad se bachne kaa bhi jugaaD nahin ye vahshatein baDi mukhlis hain aa hi jaati hain fasil-e-dil pe agarche koi daraaD nahin"

"aankhon mein iztiraab na maathe pe bal paDe laai hayaat jis pe usi raah chal paDe ghusse mein bhi hai lab pe tabassum sajaa huaa jaise ki reg-e-garm se chashma ubal paDe hai naa-rasaai dast-e-ajal ke nasib mein ham sarhad-e-hayaat se aage nikal paDe rukh kijiyo hayaat ki gaaDi kaa us taraf jis or shahr-e-khvaab kaa ne'mul-badal paDe aisi lagi hayaat ki Thokar ki daf'atan aankhon se saare khvaab zamin par phisal paDe auron se kuchh judaa hain ye ummid ke charaagh yaa'ni havaaein tez huiin aur jal paDe hai mai-kade mein rah ke bhi dair-o-haram kaa gham kyaa jaaniye ki dil ko kahaan jaa ke kal paDe"

"duniyaa ne khatm silsila-e-gham nahin kiyaa palkon ne phir bhi nauha-o-maatam nahin kiyaa phulon ke gird kaanTon ki is bud-o-baash ne khushbu tire mizaaj ko barham nahin kiyaa ham khugaraan-e-'ishq anaa ke mariz hain ham ne kisi ko khud pe muqaddam nahin kiyaa is daur-e-bevafaa ne har ik zi-hayaat par ehsaan to kiyaa hai pa paiham nahin kiyaa fart-e-khushi bhi lab pe tabassum na laa saki gham ne bhi aaj aankhon ko pur-nam nahin kiyaa baaqi rahe suhulat-e-girya ye soch kar divaar-e-zabt ko kabhi mohkam nahin kiyaa teri jafaa ke baa'd bhi badlaa nahin ye dil sarsar ne kyon charaagh ko maddham nahin kiyaa ab to hai sirf khaak-e-shifaa kaa hi aasraa ab ke faqir ne bhi koi dam nahin kiyaa"

"na khud ko paayaa na hi ghair tak rasaai ki sazaa ye kaisi mili ham ko khud-numaai ki judaa to ho gae pal bhar mein ku-e-jaanaan se magar na ho saki tadbir kuchh rihaai ki phir aaftaab-o-qamar ne bhi saath chhoD diyaa phir ik charaagh ne baDh kar ke rahnumaai ki koi to jism se aage nikal ke baat kare koi to ho jise chaahat ho paarsaai ki khilaaf-e-zulm khamoshi ye ghair-mumkin hai main chup rahaa bhi to ashkon ne lab-kushaai ki ye kis ke lams se saari fazaa mo'attar hai ye kis ki yaad ne raaton mein raushnaai ki ham aise shor-zada bad-nasib hain jin par khudaa ko chhoD ke har shakhs ne khudaai ki"

"shajar pe rahte hain chhaaon se jhuuT bolte hain ham apne dil ki sadaaon se jhuuT bolte hain ye raasta su-e-jaanaan na jaaegaa kah kar musalsal apne hi paanv se jhuuT bolte hain unhein yaqin hai manzil talak rasaai kaa vahi jo raahnumaaon se jhuuT bolte hain na jaane kis ki shafaa'at kaa aasraa le kar ye log apni khataaon se jhuuT bolte hain charaagh-paa nahin hote jafaa-e-dauraan se gharib log anaaon se jhuuT bolte hain hai istighaasa-e-hal-min bhi hech un ke liye jo saazgaar fazaaon se jhuuT bolte hain"

"tark-e-saudaa ho aagahi ke liye kitnaa dushvaar hai ye ji ke liye zindagi ke ujaaD-khaane mein khvaab rakkhe hain dilkashi ke liye honT maamur hain tabassum par ek vahshat-zada khushi ke liye kis ne maqtal mein bar-sar-e-neza maut se kaam zindagi ke liye saare 'aalam ki ne'matein maulaa ek be-laag aadmi ke liye ek dastaar ban gai phaansi ek kumbe ki laaDli ke liye aaj qurbaan ki gaiin khushiyaan gham ki tashrif-aavri ke liye rabt rakhiye kharaab-haalon se apni khush-haal zindagi ke liye kaun kis moD par bichhaD jaae raah mat chhoDiye kisi ke liye aadmiyyat ke shar se bachne ki koi tadbir aadmi ke liye"

"khaak hote rahe nibhaate rahe saari baaton pe muskuraate rahe ham ko darkaar thi koi vahshat ghar mein ik dasht saa banaate rahe jaate jaate bhi ham na jaan se gae aap bhi aa rahe the aate rahe kashtiyaan Dubti rahin yuun hi aur mallaah giit gaate rahe khud ko paayaa thaa ek 'umr ke baa'd khud ko sunte rahe sunaate rahe"