Ghazal

"ghazal mein dard ke ehsaas ko jagaae baghair hunar mein aataa nahin dil pe choT khaae baghair talaash kartaa huaa phir rahaa huun barson se kahaan gayaa miraa bachpan mujhe bataae baghair na jaane kaun si duniyaa mein log jiite hain khayaal-o-khvaab ki duniyaa koi basaae baghair kai sitaare baDe bad-nasib hote hain vo Duub jaate hain palkon pe jhilmilaae baghair mujhe ghazal bhi miri daadi-maan si lagti hai nahin sulaati kahaani koi sunaae baghair"

"kitni sachchaai kis khabar mein hai ye to akhbaar ki nazar mein hai ghar mein rahnaa tumhein nahin aataa varna saaraa sukun ghar mein hai aasmaan ek saa hai sab ke liye farq teri miri nazar mein hai zahr itnaa to saanp mein bhi nahin zahr jitnaa tumhaare Dar mein hai har qadam par bhale hon mai-khaane ek masjid bhi rahguzar mein hai main jo chaahun to phunk duun duniyaa aag itni mire jigar mein hai meri khvaahish hai chaand chhune ki yojnaa aaj bhi adhar mein hai"

"ham log apni raah ki divaar ho gae yaani ki maslahat mein giraftaar ho gae ab to buland aur zaraa hausla karo patthar jo mel ke the vo divaar ho gae tufaan mein ham ko chhoD ke jaane kaa shukriya ab apne haath paanv hi patvaar ho gae ghar ko giraane vaale siyaasi mizaaj the gham mein sharik ho ke vo gham-khvaar ho gae parde ki baat parde pe khul kar jo aa gai bachche samay se pahle samajhdaar ho gae itni zaraa si baat pe hairaan hai mizaaj kaaghaz ke phuul kaise mahak-daar ho gae"

"mujh par inaayatein hain kai saahibaan ki kuchh hain zamin vaalon ki kuchh aasmaan ki apne safar kaa tanhaa musaafir nahin huun main izzat juDi hai mujh se mire khaandaan ki vo mujh ko aazmaa ke kaDi dhuup mein rahaa mujh ko khizaan bahaar lagi imtihaan ki 'khusrav-amir' ki yaa barahman ki ho ghazal muhtaaj kab rahi hai kisi bhi zabaan ki hindi ki apni shaan hai urdu ki apni shaan donon hi aan-baan hain hindostaan ki"

"vasl ki to kabhi furqat ki ghazal likhte hain ham to shaair hain mohabbat ki ghazal likhte hain paDhiye un ko kisi kaaghaz pe nahin sarhad par apne khuun se jo shahaadat ki ghazal likhte hain rahnumaa apne vatan ke bhi hain kitne shaatir vo shahaadat pe siyaasat ki ghazal likhte hain tum ne mazdur ke chhaale nahin dekhe shaayad apne haathon pe vo mehnat ki ghazal likhte hain mulk aise bhi hain kuchh khaas paDosi apne sarhadon pe jo adaavat ki ghazal likhte hain ham sabhi chain se sote hain magar raaton mein fauj vaale to hifaazat ki ghazal likhte hain shauq likhne kaa bahut ham ko bhi hai lekin ham sone ke pen se ghurbat ki ghazal likhte hain"

"zindagi thaam liyaa karte hain baDh kar lamhe vaqt aane pe badalte hain muqaddar lamhe aa bhi jaa tujh ko bulaate hain ye kah kar lamhe phir na aaeinge bahaaron ke moattar lamhe har ghaDi ek saa mausam bhi kahaan rahtaa hai hain kahin phuul se komal kahin patthar lamhe sab mein yaari hain yahaan dosti yaari sukh dukh kis ne dekhe hain yahaan umr se baDh kar lamhe zindagi aaj bhi masruf bahut hai lekin ham chale aae tire paas churaa kar lamhe ek naa-chiz ko fankaar banaa dete hain haasil-e-umr huaa karte hain dam-bhar lamhe"

"kyaa khabar thi ranjishein hi darmiyaan rah jaaeingi ham gale milte raheinge duriyaan rah jaaeingi ye nagar bhi kaar-khaanon kaa nagar ho jaaegaa in darakhton ki jagah kuchh chimniyaan rah jaaeingi dhire dhire shor sannaaTon mein gum ho jaaegaa aur saDkon par chamakti batiyaan rah jaaeingi raat jis dam apne kambal mein chhupaa legi hamein haath malti aur ThiThurti sardiyaan rah jaaeingi ham ne sochaa thaa ki un kaa haath hogaa haath mein kyaa khabar thi haath mein bas chiTThiyaan rah jaaeingi ye tamaasha aur thoDi der tak hogaa abhi phir yahaan bas khaali khaali kursiyaan rah jaaeingi aag thoDi der ko bujh jaaegi lekin mizaaj raakh ke niche dabi chingaariyaan rah jaaeingi"