Ghazal

"miraa vujud nahin hai faqat jahaan ke liye mujhe khudaa ne banaayaa hai laa-makaan ke liye miraa vujud zamin ki hadon talak hi nahin miraa safar to musalsal hai do-jahaan ke liye ye mere tajrabe hi manzilon ke rahbar hain main sochtaa hi nahin mir-e-kaarvaan ke liye havaa-e-garm ne shaakhein tabaah kar Daalin lagaae the jo shajar ham ne saaebaan ke liye uDaa diye hain na jaane kahaan havaa ne sab jo tinke chun liye the main ne aashiyaan ke liye zamaane ke liye rahbar se kam nahin hai tu tiraa vujud nahin hai faqat fughaan ke liye visaal-e-yaar ki khvaahish mein dil taDaptaa hai zamin jaise taDapti hai aasmaan ke liye miri hayaat to kuchh bhi nahin tumhaare baghair tumhaaraa 'ishq zaruri hai qalb-o-jaan ke liye ye rang-o-bu ye gulistaan ye khushnumaa manzar tumhaaraa husn hi kaafi hai daastaan ke liye main is jahaan mein huun lekin phir ik jahaan hai aur ye zindagi hai haqiqat mein us jahaan ke liye tu rang-o-bu ke nazaaron mein kho na jaa 'ashhar' ye rang-o-bu hain faqat tere imtihaan ke liye"

"husn-e-jaanaan ne kiyaa hai hamein mashur zaraa dida-e-shauq ne bhi kar diyaa mahsur zaraa jaan par meri ban aai hai khudaa khair kare chashm-e-qaatil ko kare ab koi mastur zaraa shahr mein ham se kahaan pahle koi vaaqif thaa nisbat-e-yaar se ham bhi hue mashhur zaraa ham ne dekhaa hai vo sar kaaT diye jaate hain baa-khudaa jo bhi yahaan hote hain maghrur zaraa har koi jaan hatheli pe yahaan rakhtaa hai shahr-e-dil kaa ba-khudaa haT ke he dastur zaraa ham ko mat sahl samajhnaa are naadaan kabhi bas-ki ham vaqt ke haathon hue majbur zaraa dekhnaa kaise tumhaaraa ye futur utregaa tum ki taaqat ke nashe mein ho abhi chuur zaraa har qadam soch ke ham ko ab uThaanaa hogaa bas-ki manzil hai hamaari abhi kuchh duur zaraa mushkilon se kabhi ghabraate nahin 'ashhar' ham bas-ki haalaat ke haathon hue ranjur zaraa"

"tere jaane se huaa dil dasht-e-viraan ki tarah shahr saaraa lagtaa hai ujDe gulistaan ki tarah main ne maangaa hai du'aaon mein tumhein taqdir se tum dil-o-jaan mein base ho jaan-e-jaanaan ki tarah qalb-e-muztar mein tire didaar ki hasrat liye bas tiri dahliz par baiThaa huun darbaan ki tarah main ne kyaa kyaa khvaab dekhe hain tumhaari diid ke baam par aao kabhi tum maah-e-taabaan ki tarah ghair ko bosa-zani karte hue dekhaa hai jab aaina taktaa rahaa huun main pashemaan ki tarah rasm-e-ulfat se nahin ho aashnaa tum bevafaa tum vafaa bhi karte ho to ek ehsaan ki tarah kyaa bataaun kaise samjhaaun masaail kitne hain zindagi uljhi hui hai zulf-e-pechaan ki tarah harsu ranj-o-gham kaa 'aalam aur afraa-tafri hai shor barpaa hai yahaan shaam-e-gharibaan ki tarah saari duniyaa dekhi main ne jasta jasta baa-khudaa koi chehra hi nahin aayaa nazar maan ki tarah zindagi ne aisi karvaT li hai 'ashhar' kyaa kahun ab to apne ghar mein bhi rahtaa huun mehmaan ki tarah"

"vo pahli si raunaq chaman mein kahaan hai yahaan har taraf bas dhuaan hi dhuaan hai nahin koi meraa yahaan ham-zabaan hai yahaan har koi mujh se bas bad-gumaan hai mujhe aashiyaan ki zarurat kahaan hai miraa aashiyaan to ye saaraa jahaan hai tu hi raahbar hai tu hi paasbaan hai luTeron ki zad mein miraa kaarvaan hai kaDi dhuup mein jaise vo saaebaan hai miri maan miri jaan aaraam-e-jaan hai haqiqat vo mujh se chhupaaegi kab tak nigaahon mein us ki mohabbat 'ayaan hai safar ki tavaalat kaa mujh ko nahin Dar abhi hausla meraa 'ashhar' javaan hai"

"sho'la dil se jab uThegaa to ghazal ho jaaegi zakhm dil par jo lagegaa to ghazal ho jaaegi be-dili mein din Dhalegaa to ghazal ho jaaegi dard-e-furqat mein jalegaa to ghazal ho jaaegi hosh mein likhnaa kamaal-e-fan nahin hai be-khabar be-khudi mein jab likhegaa to ghazal ho jaaegi aankhon se aankhein mileingi dhaDkanein ruk jaaeingi rukh se parda jo haTegaa to ghazal ho jaaegi aaina jab khanda-zan hogaa tumhaare haal par vaqt jab tum par hansegaa to ghazal ho jaaegi raat din 'ashhar' tafakkur mein guzar jaaein to kyaa lazzat-e-girya chakhegaa to ghazal ho jaaegi"

"shab-e-zulmat mein bhi ham raushni ki baat karte hain ghamon ke daur mein bhi ham khushi ki baat karte hain hazaaron khvaahishein dil mein liye chalte hain har lamha ajal raqsaan magar ham zindagi ki baat karte hain hamein maa'lum hai auqaat apni kyaa hai duniyaa mein magar phir bhi hamesha ham khudi ki baat karte hain gham-e-duniyaa ke maare hain muqaddar ke sataae ham magar phir bhi hamesha dil-lagi ki baat karte hain zamaana dushmani ki baat karte karte guzraa hai chalo kuchh der 'ashhar' dosti ki baat karte hain"

"manzil milegi tum ko manzil se lau lagaa ke chalte raho musalsal apne qadam jamaa ke kyaa haath aa gayaa hai tum ko haram mein jaa ke kyon paarsaa bane ho logon pe zulm Dhaa ke dil ko sukun milaa kyaa naahaq lahu bahaa ke aakhir tumhein milaa kyaa ye bastiyaan jalaa ke zaalim ke saamne ham kyon apnaa sar jhukaaein jitne bhi din jiyeinge ji leinge sar uThaa ke kuchh apni tum sunaao kuchh meri bhi suno tum dil ko sukun milegaa thoDaa qarib aa ke"