Ghazal

"khud-sataai se na ham baaz anaa se aae go tire shahr mein jaa kar ke bhi pyaase aae is javaani mein bhi ilzaam se Darnaa hairat kaun chehre pe nahin kiil muhaase aae us ne ik khaas tanaasub se mohabbat baanTi mere hisse mein hamesha hi dilaase aae baat ausaaf ki hai nam ki nahin hai bhaai log be-ant samundar se bhi pyaase aae DhunDhtaa hai koi mujh jaisaa mujhe gird-o-navaah ik sadaa mere taaaqub mein sadaa se aae main ba-sad-shauq giraftaar-e-rah-e-ishq huaa varna kuchh log yahaan apni khataa se aae sirf taqlid se hi qais nahin ban sakte yaani is ishq kaa karnaa bhi ataa se aae"

"paanv dekhegi na taakhir kaa dukh samjhegi kaise manzil kisi rah-gir kaa dukh samjhegi kab samaaat pe koi harf-e-sadaa utregaa kab vo dastak miri zanjir kaa dukh samjhegi aks kar dungaa main divaar par apnaa chehra aur duniyaa ise tasvir kaa dukh samjhegi hanste hanste hi sunegi vo miri ghazlon ko phir mire dard ko bhi miir kaa dukh samjhegi kaise auraaq bataaeinge kahaani meri diary kyuun miri tahrir kaa dukh samjhegi main viraasat mein milaa taaj-mahal huun us ko mujh ko haaregi to taskhir kaa dukh samjhegi mujh ko bhuli hai jo shohrat ko asaasa jaane khud se bichhDegi to tashhir kaa dukh samjhegi"

"gung hain saari zaminein aasmaan hairat-zada raftagaan shashdar sabhi aaindagaan hairat-zada chuus leti hai zamin paani jahaan hon nafratein khushk hoti nahr pe mat hon kisaan hairat-zada kaun ghar kaa hai ye dhovan kis ki hai yakh-bastagi barf hoti is nadi kaa sab dhuaan hairat-zada is tahayyur-khez shahr-e-nur ki har shai ajab har yaqin hairat-zada har-ik gumaan hairat-zada daakhle par takhtiyaan hain jin pe kunda naam hain kaun kaise kis tarah aur hai kahaan hairat-zada sang-e-marmar se banaa jangal jahaan-e-aarzu daftari lahja liye main ik javaan hairat-zada kis tarah kaa dars mujh ko de rahaa hai aaftaab sahn-e-maktab mein kahin hai kahkashaan hairat-zada zikr thaa malfuf kun kaa aasmaan ki baat thi sun rahaa thaa shahr saaraa daastaan hairat-zada"

"dard kaa kohsaar khinchtaa huun saans kab hai ghubaar khinchtaa huun ishq hai hi nahin ye tohmat hai dil nahin hai main baar khinchtaa huun nabz hai Dubne bhi lagti hai saans hai zor-daar khinchtaa huun khinchtaa huun use main apni taraf aur be-ikhtiyaar khinchtaa huun to koi saarbaan kartaa hai main khud apni mahaar khinchtaa huun sher kahtaa huun main alag Dhab se qaafiya jaan-daar khinchtaa huun camere mutmain nahin karte aks hain baar baar khinchtaa huun"

"harf-o-khayaal-o-taazgi she'ri jamaal aur shai goyaa vo husn aur hai us ki sanbhaal aur shai dekh ye tu nahin hai to dekh ye main nahin huun main maut alag mu'aamla ain-e-visaal aur shai yaa'ni faqir khaamushi yaa'ni gadaai shor hai yaa'ni ye raqs kuchh nahin yaa'ni dhamaal aur shai jo ne dikhaai de sake us par yaqin kijiye ain-e-jamaal aur hai aks-e-jamaal aur shai tu ne jo paa liyaa vo kyaa mujh se jo kho gayaa vo kyaa teraa 'uruj kuchh nahin meraa zavaal aur shai yaa'ni ki 'ishq kijiye yaa'ni ye 'umr kuchh nahin yaa'ni ki shauq aur shai ahl-o-ayaal aur shai dekh junun-e-khabt mein farq bahut hai dostaa 'ishq ki aag aur hai teraa ubaal aur shai dil mein ubhar chukaa hai jo us kaa ghurub hi nahin yaa'ni ye sharq aur hai goyaa shumaal aur shai"

"hain kaise kaise maraahil guhar se aage bhi ghazal kuchh aur hai kaar-e-hunar se aage bhi ye shoabde kaa tajassus na khatm hogaa kabhi jahaan hogaa jahaan-e-digar se aage bhi bhare julus mein goli se maaraa jaaungaa main sochtaa huun khudaa-e-bashar se aage bhi ye ird-gard ke manzar mire shanaasaa hain guzar huaa hai isi rahguzar se aage bhi varaa-e-chashm manaazir ki khoj jaari rakh nazar baDhaa zaraa hadd-e-nazar se aage bhi ik aur jism hai meri nazar mein tujh saa hi ik aur rang hai rang-e-sahar se aage bhi aziyyatein hain moharram ke baad bhi kitni safar mazid hain maah-e-safar se aage bhi paraai aankh ki putli sahaaraa kyaa deti vahaan ik aur bhanvar thaa bhanvar se aage bhi khule hain raaz kai mere qatl ke mujh par paDhi hai main ne kahaani khabar se aage bhi"

"suhaani yaad kaa dhokaa na kharch ho jaae miraa ye aakhiri sikka na kharch ho jaae mujhe hai shauq miraa kam-sukhan kahe kuchh to use hai fikr ki jumla na kharch ho jaae gulaab suukh na jaae kitaab mein rakkhaa pas-e-naqaab hi chehra na kharch ho jaae tumhaari aankh mein is vaaste nahin takte hamaari pyaas pe dariyaa na kharch ho jaae na yuun bhi saint ke rakkho ki bhuul hi jaao paDaa paDaa koi puuraa na kharch ho jaae mujhe khabar hai vo dariyaa-mizaaj aadmi hai mujh aise dasht kaa puuraa na kharch ho jaae"

"saaf auraaq hain likhne ki jagah khaali hai yaani us maang mein taare ki jagah khaali hai nahr ke paar gayaa yaar nahin palTaa kabhi car mein ab bhi kamine ki jagah khaali hai koi khush-rang dilaasa hai to likhte jaao meri divaar pe naare ki jagah khaali hai aaj bhi khaaT pe bosida badan dekhtaa huun baap ke baad bhi kone ki jagah khaali hai chaak par rakkhi hui duniyaa mukammal kar do aakhiri jism pe chehre ki jagah khaali hai meri ghazlein hain sabhi baad tire be-matla saare naghmaat mein mukhDe ki jagah khaali hai maazarat yaar nayaa ishq nahin ho saktaa dil mayassar hai na siine ki jagah khaali hai"

"rang ke gahre the lekin duur se achchhe lage adh-khili un khiDkiyon par jaamuni parde lage khushk hoti bel se divaar chhuTi dafatan zard patton ko bachaate phuul khud girne lage pakke rishton mein daraaDon ki kahaani khul gai Dubne vaale ko saare hi ghaDe kachche lage ik takhayyul jism oDhe aan baiThaa saamne lafz bhi ab soch ko tasvir saa karne lage bail ne bas siing badle aur duniyaa hil gai chand lamhe shahr kaa jughraafiya likhne lage be-zarurat ghonsle par ek chiDiyaa muztarib do parinde aaj pahli baar hain uDne lage"

"andhere duur kare nuur se ujaale mujhe koi to ho jo tire baad bhi sambhaale mujhe main mar rahaa huun magar saans de rahe hain baham tumhaari zaat se mansub kuchh havaale mujhe ye rud-e-khvaab nahin makhmase kaa dariyaa hai Duboe ishq kabhi josh mein uchhaale mujhe abhi main rail ki paTri se duur baiThaa huun abhi hai vaqt agar ho sake manaa le mujhe nahin hai yaad mujhe naam haan magar aankhein sharaab bhuul chukaa yaad hain pyaale mujhe main saunp duun use inaam mein bachi saansein mire vajud ke malbe se jo nikaale mujhe nishaan mel ki ranginiyon ke sadqe hue bahut aziiz hain paanv ke saare chhaale mujhe"

"jaise pardes mein raaton ko vatan khinchtaa hai yuun tire dasht-navardon ko chaman khinchtaa hai kis ki aahein yuun sar-e-dasht-e-talab gunjti hain kaun viraan manaazir se thakan khinchtaa hai harf aa aa ke bajaate hain miraa darvaaza sher ho ho ke mire dil ki ghuTan khinchtaa hai bojh Dhonaa hai bahar-taur ho jaise-taise varna yuun kaun ba-sad-shauq badan khinchtaa hai ek hijrat hai ki tasvir hui jaati hai ek qissa hai su-e-baagh-e-adan khinchtaa hai ziist ik ahd ke dhaage se bandhi chalti hai qabr har roz bulaati hai kafan khinchtaa hai"