Ghazal

"hu ke 'aalam mein bhi ik shor sunaai degaa jo samaa'at ko bahut miThaa sujhaai degaa haif nafrat ke jaziron mein bhaTakte rah kar ek insaan mohabbat ki duhaai degaa ek din log mohabbat se shanaasaa honge aur ye saaz bahut duur sunaai degaa ek duniyaa mujhe rote hue rukhsat hogi aur ik shakhs kahin bhi na dikhaai degaa go ki har samt mein phailaa hai andheraa 'baasit' koi hogaa jo andhere mein dikhaai degaa"

"koi viraan hai mire andar ek tufaan hai mire andar main qadaamat-parast shahzaada shahr sunsaan hai mire andar arz-e-kashmir sun tire gham kaa ik dabistaan hai mire andar ulfat-e-murtazaa mein jiitaa huun yaa'ni quraan hai mire andar"

"ai zindagi abhi to khataaein karungaa main apne lahu se tar ye fazaaein karungaa main apne liye aziyyat-o-aalaam bhi qubul tere liye sukun ki du'aaein karungaa main main phuul baanTtaa huun isi shahr mein magar kuchh kaam ho to mujh ko bataaein karungaa main khvaabon ki ramz jaan ke kuchh khvaab toD kar khud se ab aur kitni jafaaein karungaa main main kaamyaab lauTungaa is bhiD-bhaaD se kaar-e-jafaa ke badle vafaaein karungaa main"

"koi afsaana-e-zindaan sunaataa hai mujhe aur jiine ki tadaabir bataataa hai mujhe ek hi dukh hai ki divaar se lag kar koi roe jaataa hai mujhe ghurtaa jaataa hai mujhe ek saaya hai miraa Dal ke kinaare baiThaa aur har roz vo us paar bulaataa hai mujhe ye jo mausam kaa chalan 'ain tire jaisaa hai ye to har roz tire khvaab dikhaataa hai mujhe ranj-o-aalaam ki taa'zim mujhe aati hai us pe kahne kaa saliqa bhi to aataa hai mujhe vaqt se qabl vo aataa hai hamesha 'baasit' par bataane ko bahut der bataataa hai mujhe"

"ik shaam ki udaasi kaa gham aasmaan kaa dukh phir niind le uDaa hai vo pichhli khizaan kaa dukh muddat se khoj mein huun kabhi to pataa chale mujh ko kahaan milaa thaa ye saare jahaan kaa dukh saalaar kho gayaa hai miri fauj kaa kahin tum ko khabar kahaan hai mire kaarvaan kaa dukh sarhad pe jis kaa beTaa abhi kal hi mar gayaa mahsus kar rahaa huun main us ek maan kaa dukh ashkon se jis ke gaanv ke sab peD jal gae sadiyaan nigal chukaa hai us aatish-fishaan kaa dukh"

"naqsh-e-paa DhunDne niklaa thaa jahaan tak aayaa nit-nae naqsh banaataa main yahaan tak aayaa gaanv ko chhoD ke aane kaa iraada thaa miraa shahr mein ek rafugar ki dukaan tak aayaa aable phoD ke chaltaa huaa aayaa lekin surkh phulon ke ta'aaqub mein yahaan tak aayaa agle hi moD pe vo 'aks milegaa mujh ko main isi zo'm mein qadmon ke nishaan tak aayaa"

"zinda ho kar bhi kai roz se zinda nahin huun aur is par main kai roz se royaa nahin huun ek hi shakhs gavaaraa hai zamin par mujh ko vo bhi aavaaz lagaae to palaTtaa nahin huun kuchh parinde to chahakte hain mujhe vaqt-e-sahar kuchh parindon ko khabar hai ki main soyaa nahin huun naaz kartaa hai vo khush-chashm mire hone par mujh pe kyaa naaz ki ai dost main khud kaa nahin huun vo tavajjoh jo mayassar hi nahin hai mujh ko ho mayassar to sar-e-bazm bikhartaa nahin huun"