Ghazal

mare dil biich naqsh-e-naaznin hai

magar ye dil nahin yaaro nagin hai

kamar par teri us kaa dil huaa mahv

tiraa aashiq bahut baarik-bin hai

· · ·

dhuup saa yu kapul naari hai

kiran suraj ki vo kanaari hai

chhup raqibaan suun aanaa nahin vo chaand

kyaa rain hijr ki andiyaari hai

· · ·

yaar meraa miyaan-e-gulshan hai

gharq-e-khun phuul taa-ba-daaman hai

dil lubhaataa hai sab kaa vo saajan

dil-farebi mein us ko kyaa fan hai

· · ·

meri jaan vo baada-khvaari yaad hai

vaqt-e-masti girya-zaari yaad hai

motiyaa kaa haar o champaa ki chhaDi

joDaa-e-daaman-kinaari yaad hai

· · ·

be-sabab ham se judaai na karo

mujh se aashiq se buraai na karo

khaaksaaraan ko na kariye paamaal

jag mein firaun si khudaai na karo

· · ·

jaagir agar bahut na mili ham kuun gham nahin

haasil hamaare mulk-e-qanaaat kaa kam nahin

is saath mah-rukhaan ko nahin kuchh baraabari

yusuf se ye nigaar-e-pari-zaad kam nahin

· · ·

ai sajan vaqt-e-jaan-gudaazi hai

mausam-e-aish-o-fasl-baazi hai

in chakoron se duur rah ai chaand

qaul ushshaaq kaa namaazi hai

· · ·

abru ne tire khinchi kamaan jaur-o-jafaa par

qurbaan karun sau jiiv tire tir-e-adaa par

yaaqut ko laave nahin khaatir mein kabhi vo

jis ki nazar ai yaar paDe teri hinaa par

· · ·

khubaan ke biich jaanaan mumtaaz hai saraapaa

andaaz-e-dilbari mein e'jaaz hai saraapaa

pal pal maTak ke dekhe Dag Dag chale laTak ke

vo shokh chhal chhabilaa tannaaz hai saraapaa

· · ·

jaan-e-ayyaam-e-dilbari hai yaad

sair-e-gul-zaar-o-mai-khori hai yaad

dekhtaa nahin suraj kuun nazraan bhar

jis kuun tujh jaama-e-zari hai yaad

· · ·

mustamindaan ko sataayaa na karo

baat ko ham se duraayaa na karo

dil shikanje mein na Daalo meraa

zulf ko gundh banaayaa na karo

· · ·

ek pal jaa na kahun nain suun ai nur-e-basar

Tuk na ho is dil-e-taarik suun ai badr badar

teri is subh binaa gosh-o-khat-e-mushkin suun

sair kartaa huun 'ajab shaam-o-sahar shaam-o-sahar

· · ·

jab sajile khiraam karte hain

har taraf qatl-e-aam karte hain

mukh dikhaa chhab banaa libaas sanvaar

aashiqon ko ghulaam karte hain

· · ·

zulf teri hui kamand mujhe

is mein baandhaa hai band band mujhe

khaak seti sajan uThaa ke kiyaa

ishq tere ne sar-buland mujhe

· · ·

mujh paas kabhi vo qad-e-shamshaad na aayaa

is ghar mane vo dil-bar-e-ustaad na aayaa

gulshan miri ankhiyaan mein lage gulkhan-e-dozakh

jo sair ko mujh saath pari-zaad na aayaa

· · ·

ai yaar nasihat ko agar gosh kare tu

ye taur-o-tariq apne faraamosh kare tu

divaane siyaane huein sab dekh tujh ankhiyaan

ik chashm ki gardish seti behosh kare tu

· · ·

ai khub-ru farishta siyar-anjuman mein aa

sarv-e-ravaan-e-husn hamaare chaman mein aa

munh baandh kar kali saa na rah mere paas tu

khandaan ho kar ke gul ki sifat Tuk sukhan mein aa

· · ·

tiri gaali mujh dil ko pyaari lage

duaa meri tujh man mein bhaari lage

tadi qadr-e-aashiq ki bujhe sajan

kisi saath agar tujh kuun yaari lage

· · ·

har aashnaa se us bin begaana ho rahaa huun

majlis mein sham'-ru ki parvaana ho rahaa huun

mujh ko malaamat-e-khalq khaatir mein naahin hargiz

zulfaan ki fikr mein main divaana ho rahaa huun

· · ·

miraa mahbub sab kaa man haran hai

nazar kar dekh vo aahu nayan hai

nahin ab jag mein vaisaa aur saajan

mujhe surat-shanaasi biich fan hai

· · ·

guftam ki mukh tiraa kyaa gufta suraj suun behtar

guftam ki kaan kaa dar gufta ki bah z akhtar

guftam dahaan-o-ruyat gufta ki ghuncha-o-gul

guftam kapol kaa khaal gufta ki qurs-e-ambar

· · ·

tujh binaa dil ko be-qaraari hai

dam-ba-dam mujh ko aah-o-zaari hai

haath tere jo dekhi hai talvaar

aarzu dil ko jaan-sipaari hai

· · ·

pech bhaayaa mujh ko tujh dastaar kaa

band hai dil turra-e-zartaar kaa

ji phansaa hai jaa ke us zulfon ke biich

dil shahid us nargis-e-bimaar kaa

· · ·

chaudhvaan us chandar kaa saal huaa

husn mein badr baa-kamaal huaa

tujh saa chanchal nahin zamaane mein

ram mein ai man hiran ghazaal huaa

· · ·