Ghazal

falak pe hansne lage chaand taare shaam ke baad

hamin udaas hain dariyaa kinaare shaam ke baad

khanakti chuDiyaan khushbuein pyaar ki baatein

tamaam vasl ke hain istiaare shaam ke baad

· · ·

raat kaa ab koi jaadu nahin chalne vaalaa

ik sitaaraa hai use din mein badalne vaalaa

dushmani laakh nibhaate rahein kaale baadal

shaam se pahle ye suraj nahin Dhalne vaalaa

· · ·

apne qadam ki chaap se yuun Dar rahe hain ham

maqtal ki samt jaise safar kar rahe hain ham

kyaa chaand aur taaron ko ham jaante nahin

ai aasmaan vaalo zamin par rahe hain ham

· · ·

jab bhi hanste hue inkaar kiyaa hai us ne

dil pe ik aur nayaa vaar kiyaa hai us ne

us ko nafrat ki nigaahon se na dekhe koi

umr bhar khud ko bahut pyaar kiyaa hai us ne

· · ·

yaad kar kar ke tiri yaad miTaane nikle

le ke ghi haath mein ham aag bujhaane nikle

ham faqiron ke qalam se jo khazaane nikle

jholiyaan le ke shahanshaah charaane nikle

· · ·

bech kar tahzib daulat ke pujaari ho gae

is zamaane ke sukhanvar bhi madaari ho gae

rakh ke vo mizaan par divaan apnaa ro paDe

jab kisi ke be-sure alfaaz bhaari ho gae

· · ·

shaam khaamosh hai peDon pe ujaalaa kam hai

lauT aae hain sabhi ek parinda kam hai

dekh kar suukh gayaa kaise badan kaa paani

main na kahtaa thaa miri pyaas se dariyaa kam hai

· · ·

aankhon se kisi khvaab kaa rishta hi nahin thaa

is aaine mein aks Thahartaa hi nahin thaa

kyon dekh rahaa thaa use chup-chaap zamaana

rukhsat jo huaa sirf hamaaraa hi nahin thaa

· · ·

khayaal-o-fikr kaa sadqa utaarte rahiye

lahu pilaa ke ghazal ko sanvaarte rahiye

ghurur-e-fath mein dushman zarur Dubegaa

hai jitnaa to abhi jang haarte rahiye

· · ·

der ke saath haram aae shivaale aae

aaj chhan chhan ke andheron se ujaale aae

barhaman aae hain zunnaar liye haathon mein

hazrat-e-shaikh bhi dastaar sambhaale aae

· · ·

mil na paae kahin to hairat kyaa

tum samundar hue na ham dariyaa

mauj-dar-mauj hai yahi charchaa

kashtiyon se milaa hai kyon dariyaa

· · ·

zehn jab tere tasavvur mein ravaan hotaa hai

tu bhi bole to samaaat pe giraan hotaa hai

raaz-e-pinhaan to bahar-haal ayaan hotaa hai

lab jahaan hilte nahin ashk ravaan hotaa hai

· · ·

qubul ho gai us ki duaa to kyaa hogaa

agar vo ban gayaa ik din khudaa to kyaa hogaa

zavaal-e-fikr-o-nazar kaa ye silsila ik din

shikast-e-fikr-o-nazar ban gayaa to kyaa hogaa

· · ·

khud pi saki na jab to zamin ko pilaa gai

ik duudh ke gilaas ko billi giraa gai

baadal dikhaa ke aankhon mein sapne sajaa gai

saavan ki rut bhi gaanv ko ullu banaa gai

· · ·

agar ho zarf se khaali to kyaa rakkhaa hai dariyaa mein

samundar ko bhi main ne Dubte dekhaa hai qatra mein

ujaale DhunDne vaale ujaale DhunD lete hain

andheraa hai magar kuchh raushni ab bhi hai duniyaa mein

· · ·

manzil nahin safar mein junun-e-safar mile

naa-mo'tabar khushi hai gham-e-mo'tabar mile

ham ne to yuun kisi pe bharosaa nahin kiyaa

phir bhi koi milaa to bahut TuuT kar mile

· · ·

kyaa karoge bachaav suraj kaa

jaante ho subhaav suraj kaa

garm hai vo to kam nahin ham bhi

kaun sahtaa hai taao suraj kaa

· · ·

dosti mein na dushmani mein ham

kyaa nazar aaeinge kisi mein ham

kyuun sajaate hain khvaab sadiyon ke

chand lamhon ki zindagi mein ham

· · ·

aanaa thaa jise aaj vo aayaa to nahin hai

ye vaqt badalne kaa ishaaraa to nahin hai

daavat de kabhi kyuun vo mohabbat se bulaae

dariyaa se miri pyaas kaa rishta to nahin hai

· · ·

kyaa koi tasvir ban sakti hai surat ke baghair

phir kisi se kyuun mile koi zarurat ke baghair

dushmani to chaahne ki intihaa kaa naam hai

ye kahaani bhi adhuri hai mohabbat ke baghair

· · ·

kuchh koh-kan jo vaqf-e-zar-o-maal ho gae

tesha-ba-dast ho ke bhi kangaal ho gae

naam-o-numud izzat-o-shohrat kamaal-o-fan

ye sab to meri raah ke janjaal ho gae

· · ·

paDhi gai na vo tahrir-e-gham jabinon se

jo ponchhti rahi ashkon ko aastinon se

kabhi na degi sahaaraa shikastagi dil ki

safar na kijiye TuuTe hue safinon se

· · ·

hain muddaton se dekhne vaalon ke muntazir

ehsaas-e-be-panaah ki jaagir aur ham

koshish na kaam aaegi ye kis ne kah diyaa

baiThe biThaae maan lein taqdir aur ham

· · ·

du'aaein maang rahe hain kai khayaal abhi

khudaa ke ghar se farishton ko mat nikaal abhi

dabaa le dard abhi aansuon ko paal abhi

tiraa ye aakhiri sikka hai mat uchhaal abhi

· · ·