Ghazal

"kahaan ehsaan meri zaat par taqdir kaa hogaa huaa gar kuchh mire haq mein sila tadbir kaa hogaa miri har shab guzar jaati hai aksar is tamanna mein koi to khvaab meri is nai taabir kaa hogaa buzurgon kaa bhi saaya ab to sar se chhin gayaa apne ki ye bhi haadisa likkhaa miri taqdir kaa hogaa sabhi auraaq kahne ko to ham ne kar liye hain pur tum aao to izaafa ik nai tahrir kaa hogaa dilaasa donon jaanib se nai naslon ko miltaa hai na jaane masala kab hal magar kashmir kaa hogaa vo jin baaton se ab tak munharif hote rahe 'saifi' vahi unvaan hamaari aaj phir taqrir kaa hogaa"

"adhuraa apni hi zindagi kaa hisaab Thahraa jo chaahe paDh le hamaaraa chehraa kitaab Thahraa sunaa thaa kaanon se jo bhi us ne vo sab haqiqat hamaari aankhon ne jo bhi dekhaa vo khvaab Thahraa ikaTThaa zar kar liyaa hai us ne bhi apne ghar mein razil jitnaa thaa utnaa izzat-maaab Thahraa sunaa hai main ne vo shakhs bhi ban gayaa hai achchhaa milungaa kaise ki main to aakhir kharaab Thahraa gharib har koi naachtaa hai unhin ki dhun par ye dast-e-ahl-e-arab mein kaisaa rabaab Thahraa kiyaa hai ehsaan maut ne di najaat mujh ko shikaayaton kaa bhi khatm 'saifi' lo baab Thahraa"

"lagaa hai jo dil par mire tiir dekhein mili kyaa mohabbat mein jaagir dekhein hai chehre pe mere har ik harf kanda mire aansuon ki bhi tahrir dekhein hue raaegaan apne aa'maal saare na laai asar koi tadbir dekhein isi kashmakash mein shab-o-roz guzre koi khvaab dekhein ki taa'bir dekhein sunaa hai vahaan amn ke gul khile hain chalo chal ke vaadi-e-kashmir dekhein miri maan kaa kahnaa huaa sach ai 'saifi' du'aaon se badli hai taqdir dekhein"

"biraadaron kaa mizaaj badle yaa ghar kaa saaraa rivaaj badle rahi ye khvaahish hamesha apni jo kal badalnaa hai aaj badle hamein to matlab hai roTiyon se jo baal-bachchon kaa peT bhar de gharaz nahin hai koi bhi ham ko ye takht badle ki taaj badle abhi bhi zehnon mein saadgi hai ki gaanv chhoDe zamaana biitaa ki shahr mein bas gae hain lekin kahaan hamaare mizaaj badle jo vaqt ke saath chalte rahte ye baat paidaa na hoti hargiz ho mustahiq tum sazaa ke yuun bhi na tum ne apne rivaaj badle bure-bhale kaa tu khud hai maalik jo dil mein aae vo kar le 'saifi' tujhe badalnaa hai to badal jaa nahin ye mumkin samaaj badle"

"kabhi Dhalte hue suraj kaa manzar hi nahin dekhaa tire dil se pare main ne guzar kar hi nahin dekhaa bataaun kyaa guzarti hai mire bachchon ke zehnon par hui muddat talaash-e-rizq mein ghar hi nahin dekhaa main aaina sadaa rakhtaa huun mustaqbil ke manzar kaa kabhi maazi ki jaanib main ne muD kar hi nahin dekhaa na saahil par na kashti par koi tohmat rakhi main ne thaa Dar dil mein talaatum kaa samundar hi nahin dekhaa kami shaayad hai qismat ki ki aankhon ne miri ab tak jise almaas kahte hain vo patthar hi nahin dekhaa"

"farishton jaise duniyaa mein bashar jaldi nahin aate ki sachchaai ke haami bhi nazar jaldi nahin aate talaash-e-rizq mein kuchh is qadar masruf rahtaa huun miri bachchi ye kahti hai ki ghar jaldi nahin aate na gham kaa gham hai mujh ko ab na khushiyon ki khushi mujh ko ab aankhon mein bhi ashkon ke guhar jaldi nahin aate hamesha dhund si kyon chhaai rahti hai fazaaon mein falak par ab sitaare bhi nazar jaldi nahin aate hamaare rahnumaa aksar karein daavaa khudaai kaa siyaasat ke shajar par ab samar jaldi nahin aate ba-mushkil saans lete hain makaan unche bane itne ki jhonke bhi havaaon ke idhar jaldi nahin aate"

"yaqinan rang laaegi duaa aahista aahista karegaa bevafaa bhi ab vafaa aahista aahista gunaahon ki vabaa se bhi nahin sharminda ye aalam utaaregaa azaab apne khudaa aahista aahista sabhi zakhmon ko us ne phir hamaare kar diyaa taaza chali hai aaj yuun baad-e-sabaa aahista aahista main kaise sakte mein aakhir khaDaa huun biich raste mein koi detaa hai phir mujh ko sadaa aahista aahista na chhoDo haath se kuchh din abhi aur sabr kaa daaman pahunchti hai falak par bhi duaa aahista aahista yahaan mizaailon ki baarishein hone lagin 'saifi' ye duniyaa ho hi jaaegi fanaa aahista aahista"