Ghazal

"charaagh dil kaa muqaabil havaa ke rakhte hain har ek haal mein tevar balaa ke rakhte hain milaa diyaa hai pasina bhale hi miTTi mein ham apni aankh kaa paani bachaa ke rakhte hain hamein pasand nahin jang mein bhi makkaari jise nishaane pe rakkhein bataa ke rakhte hain kahin khulus kahin dosti kahin pe vafaa baDe qarine se ghar ko sajaa ke rakhte hain anaa-pasand hain 'hasti'-ji sach sahi lekin nazar ko apni hamesha jhukaa ke rakhte hain"

"is baar mile hain gham kuchh aur tarah se bhi aankhein hain hamaari nam kuchh aur tarah se bhi shoala bhi nahin uThtaa kaajal bhi nahin bantaa jaltaa hai kisi kaa gham kuchh aur tarah se bhi har shaakh sulagti hai har phuul dahaktaa hai girti hai kabhi shabnam kuchh aur tarah se bhi manzil ne diye taane raste bhi hanse lekin chalte rahe aksar ham kuchh aur tarah se bhi daaman kahin phailaa to mahsus huaa yaaro qad hotaa hai apnaa kam kuchh aur tarah se bhi us ne hi nahin dekhaa ye baat alag varna is baar saje the ham kuchh aur tarah se bhi"

"sirf khayaalon mein na rahaa kar khud se baahar bhi niklaa kar lab pe nahin aatin sab baatein khaamoshi ko bhi samjhaa kar umr sanvar jaaegi teri pyaar ko apnaa aaina kar jab tu koi qalam kharide pahle un kaa naam likhaa kar soch samajh sab taaq pe rakh kar pyaar mein bachchon saa machlaa kar"

"shishe ke muqaddar mein badal kyuun nahin hotaa in pattharon ki aankh mein jal kyuun nahin hotaa qudrat ke usulon mein badal kyuun nahin hotaa jo aaj huaa hai vahi kal kyuun nahin hotaa har jhiil mein paani hai har ik jhiil mein lahrein phir sab ke muqaddar mein kanval kyuun nahin hotaa jab us ne hi duniyaa kaa ye divaan rachaa hai har aadmi pyaari si ghazal kyuun nahin hotaa har baar na milne ki qasam khaa ke mile ham apne hi iraadon pe amal kyuun nahin hotaa har gaanv mein mumtaaz janam kyuun nahin leti har moD pe ik taaj-mahal kyuun nahin hotaa"

"ye mumkin hai ki mil jaaein tiri khoi hui chizein qarine se sajaa kar rakhaa zaraa bikhri hui chizein kabhi yuun bhi huaa hai hanste hanste toD di ham ne hamein maalum thaa juDti nahin TuuTi hui chizein zamaane ke liye jo hain baDi naayaab aur mahngi hamaare dil se sab ki sab hain vo utri hui chizein dikhaati hain hamein majburiyaan aise bhi dil aksar uThaani paDti hain phir se hamein pheinki hui chizein kisi mahfil mein jab insaaniyat kaa naam aayaa hai hamein yaad aa gai baazaar mein bikti hui chizein"

"DhunDaa hai har jagah pa kahin par nahin milaa gham se to gahraa koi samundar nahin milaa ye tajraba huaa hai mohabbat ki raah mein kho kar milaa jo ham ko vo paa kar nahin milaa dahliz apni chhoD di jis ne bhi ek baar divaar-o-dar hi us ko mile ghar nahin milaa saari chamak hamaare pasine ki hai janaab virse mein ham ko koi bhi zevar nahin milaa ghar se hamaari aankh-micholi rahi sadaa aangan nahin milaa to kabhi dar nahin milaa"

"vo bhi chup-chaap hai is baar ye qissa kyaa hai tum bhi khaamosh ho sarkaar ye qissa kyaa hai sirf nafrat hi thi mere liye jin ke dil mein ho gae vo bhi taraf-daar ye qissa kyaa hai saamne koi bhanvar hai na talaatum phir bhi chhuTti jaae hai patvaar ye qissa kyaa hai baiThte jab hain khilaune vo banaane ke liye un se ban jaate hain hathiyaar ye qissa kyaa hai vo jo qisse mein thaa shaamil vahi kahtaa hai mujhe mujh ko maalum nahin yaar ye qissa kyaa hai"

"khvaab mein teraa aanaa-jaanaa pahle bhi thaa aaj bhi hai tujh se ik rishta an-jaanaa pahle bhi thaa aaj bhi hai rang badalti is duniyaa mein sab kuchh badal gayaa lekin mere labon par teraa fasaana pahle bhi thaa aaj bhi hai apne dukh-sukh kah lenaa kabhi hans lenaa kabhi ro lenaa tanhaai se apnaa yaaraana pahle bhi thaa aaj bhi hai jis panchhi ki parvaazon mein josh-e-junun bhi shaamil ho us ki khaatir aab-o-daana pahle bhi thaa aaj bhi hai raah-e-vafaa mein phuul nahin hain khaar bahut hain 'hasti' ji pyaar kaa dushman saaraa zamaana pahle bhi thaa aaj bhi hai"

"dil mein jo mohabbat ki raushni nahin hoti itni khubsurat ye zindagi nahin hoti dost pe karam karnaa aur hisaab bhi rakhnaa kaarobaar hotaa hai dosti nahin hoti khud charaagh ban ke jal vaqt ke andhere mein bhiik ke ujaalon se raushni nahin hoti shaaeri hai sarmaayaa khush-nasib logon kaa baans ki har ik Tahni baansuri nahin hoti khel zindagi ke tum khelte raho yaaro haar jiit koi bhi aakhiri nahin hoti"

"pyaar kaa pahlaa khat likhne mein vaqt to lagtaa hai nae parindon ko uDne mein vaqt to lagtaa hai jism ki baat nahin thi un ke dil tak jaanaa thaa lambi duuri tai karne mein vaqt to lagtaa hai gaanTh agar lag jaae to phir rishte hon yaa Dori laakh karein koshish khulne mein vaqt to lagtaa hai ham ne ilaaj-e-zakhm-e-dil to DhunD liyaa lekin gahre zakhmon ko bharne mein vaqt to lagtaa hai"