Ghazal

"aankhon se kisi khvaab ko baahar nahin dekhaa phir ishq ne aisaa koi manzar nahin dekhaa ye shahr-e-sadaaqat hai qadam soch ke rakhnaa shaane pe kisi ke bhi yahaan sar nahin dekhaa ham umr basar karte rahe 'mir' ki maanind khiDki ko kabhi khol ke baahar nahin dekhaa vo ishq ko kis tarah samajh paaegaa jis ne sahraa se gale milte samundar nahin dekhaa ham apni ghazal ko hi sajaate rahe 'raahat' aaina kabhi ham ne sanvar kar nahin dekhaa"

"har ek khvaab ki taabir thoDi hoti hai mohabbaton ki ye taqdir thoDi hoti hai kabhi kabhi to judaa be-sabab bhi hote hain sadaa zamaane ki taqsir thoDi hoti hai palak pe Thahre hue ashk se kahaa main ne har ek dard ki tashhir thoDi hoti hai safar ye karte hain ik dil se dusre dil tak dukhon ke paanv mein zanjir thoDi hoti hai duaa ko haath uThaao to dhyaan mein rakhnaa har ek lafz mein taasir thoDi hoti hai"

"vaqt aisaa koi tujh par aae khushk aankhon mein samundar aae mere aangan mein nahin thi beri phir bhi har samt se patthar aae raasta dekh na gori us kaa kab koi shahr mein jaa kar aae zikr sunti huun ujaale kaa bahut us se kahnaa ki mire ghar aae naam le jab bhi vafaa kaa koi jaane kyuun aankh miri bhar aae"

"tumhaare ishq pe dil ko jo maan thaa na rahaa sitaara ek sar-e-aasmaan thaa na rahaa vo aur the ki jo naa-khush the do jahaan le kar hamaare paas to bas ik jahaan thaa na rahaa tu apni fath kaa ailaan kar main haar gai vo hausla ki mujhe jis pe maan thaa na rahaa vahi kahaani hai kirdaar bhi vahi hain magar jo ek naam sar-e-daastaan thaa na rahaa sadaaein doge palaT kar kabhi to dekhoge hamaare dil mein ye mubham gumaan thaa na rahaa"

"havaa ke saath ye kaisaa moaamla huaa hai bujhaa chuki thi jise vo diyaa jalaa huaa hai huzur aap koi faisla karein to sahi hain sar jhuke hue darbaar bhi lagaa huaa hai khaDe hain saamne kab se magar nahin paDhte vo ek lafz jo divaar par likhaa huaa hai hai kis kaa aks jo dekhaa hai aaine se alag ye kaisaa naqsh hai jo ruuh par banaa huaa hai ye kis kaa khvaab hai taabir ke taaaqub mein ye kaisaa ashk hai jo khaak mein milaa huaa hai ye kis ki yaad ki baarish mein bhigtaa hai badan ye kaisaa phuul sar-e-shaakh-e-jaan khilaa huaa hai sitaara TuTte dekhaa to Dar gai 'raahat' khabar na thi yahi taqdir mein likhaa huaa hai"

"kisi bhi raaegaani se baDaa hai ye dukh to zindagaani se baDaa hai na ham se ishq kaa mafhum puchho ye lafz apne maaani se baDaa hai hamaari aankh kaa ye ek aansu tumhaari raajdhaani se baDaa hai guzar jaaegi saari raat is mein miraa qissa kahaani se baDaa hai tiraa khaamosh saa izhaar 'raahat' kisi ki lan-taraani se baDaa hai"

"main aab-e-ishq mein hal ho gai huun adhuri thi mukammal ho gai huun palaT kar phir nahin aataa kabhi jo main vo guzraa huaa kal ho gai huun bahut taakhir se paayaa hai khud ko main apne sabr kaa phal ho gai huun mili hai ishq ki saughaat jab se udaasi teraa aanchal ho gai huun sulajhne se ulajhti jaa rahi huun main apni zulf kaa bal ho gai huun barasti hai jo be-mausam hi aksar usi baarish mein jal thal ho gai huun miri khvaahish hai suraj chhu ke dekhun mujhe lagtaa hai paagal ho gai huun"

"fasaana ab koi anjaam paanaa chaahtaa hai taalluq TuTne ko ik bahaana chaahtaa hai jahaan ik shakhs bhi miltaa nahin hai chaahne se vahaan ye dil hatheli par zamaana chaahtaa hai mujhe samjhaa rahi hai aankh ki tahrir us ki vo aadhe raaste se lauT jaanaa chaahtaa hai ye laazim hai ki aankhein daan kar de ishq ko vo jo apne khvaab ki taabir paanaa chaahtaa hai bahut uktaa gayaa hai be-sukuni se vo apni samundar jhiil ke nazdik aanaa chaahtaa hai vo mujh ko aazmaataa hi rahaa hai zindagi bhar magar ye dil ab us ko aazmaanaa chaahtaa hai use bhi zindagi karni paDegi 'mir' jaisi sukhan se gar koi rishta nibhaanaa chaahtaa hai"

"misaal-e-khaak kahin par bikhar ke dekhte hain qaraar mar ke milegaa to mar ke dekhte hain sunaa hai khvaab mukammal kabhi nahin hote sunaa hai ishq khataa hai so kar ke dekhte hain kisi ki aankh mein Dhal jaataa hai hamaaraa aks jab aaine mein kabhi ban sanvar ke dekhte hain hamaare ishq ki miraas hai bas ek hi khvaab to aao ham use taabir kar ke dekhte hain sivaae khaak ke kuchh bhi nazar nahin aataa zamin pe jab bhi sitaare utar ke dekhte hain ye hukm hai ki zamin-e-'faraaz' mein likkhein so is zamin mein ham paanv dhar ke dekhte hain"

"kahaani ko mukammal jo kare vo baab uThaa laai main us ki aankh ke saahil se apne khvaab uThaa laai khushi meri gavaara thi na qismat ko na duniyaa ko so main kuchh gham baraa-e-khaatir-e-ahbaab uThaa laai hamesha ki tarah sar ko jhukaayaa us ki khvaahish par andheraa khud liyaa us ke liye mahtaab uThaa laai sameTe us ke aansu apne aanchal mein to jaane kyuun mujhe aisaa lagaa kuchh gauhar-e-naayaab uThaa laai mayassar thaa na koi khvaab in aankhon mein rakhne ko so main in ke liye ashkon kaa ik sailaab uThaa laai"

"vaqt ki aankh se kuchh khvaab nae maangtaa hai dil miraa ek duaa raat gae maangtaa hai ek aavaaz tah-e-aab bulaati hai mujhe ishq mujh se bhi vahi kachche ghaDe maangtaa hai dard kahtaa hai kisi saaat-e-tanhaa mein rahun ik makaan gahre samundar se pare maangtaa hai zabt chaahe use rukhsat ki ijaazat mil jaae ashk aankhon se mohabbat ke sile maangtaa hai dasht dar dasht liye phirtaa hai mujh ko ye junun imtihaan ishq mein kuchh aur kaDe maangtaa hai"

"charaagh haath mein thaa tiir bhi kamaan mein thaa main phir bhi haar gai tu jo darmiyaan mein thaa main aasmaan ki hadon ko bhi paar kar leti magar vo khauf jo haael meri uDaan mein thaa thi zakhm zakhm magar khud ko TuTne na diyaa samundaron se sivaa hausla chaTaan mein thaa badal bhi saktaa hai akhbaar ki khabar ki tarah tiraa ye vasf bhalaa kab mire gumaan mein thaa akelaa chhoD diyaa dhuup mein safar ke liye us ek shakhs ne jo dil ke saaebaan mein thaa yaqin tujh pe bhalaa kis tarah main kar leti tazaad had se ziyaada tire bayaan mein thaa"

"taalluq ki nai ik rasm ab ijaad karnaa hai na us ko bhulnaa hai aur na us ko yaad karnaa hai zabaanein kaT gaiin to kyaa salaamat ungliyaan to hain dar o divaar pe likh do tumhein fariyaad karnaa hai sitaara khush-gumaani kaa sajaayaa hai hatheli par kisi surat hamein to apne dil ko shaad karnaa hai banaa kar ek ghar dil ki zamin par us ki yaadon kaa kabhi aabaad karnaa hai kabhi barbaad karnaa hai taqaazaa vaqt kaa ye hai na pichhe muD ke dekhein ham so ham ko vaqt ke is faisle par saad karnaa hai"

"ye kahnaa thaa jo duniyaa kah rahi hai ye gangaa kab se ulTi bah rahi hai khabar hai khvaab TuTegaa yaqinan magar ik faakhta dukh sah rahi hai lagi thi us ki buniyaadon mein dimak so ab dil ki imaarat Dhah rahi hai kahin ye khushk ho jaae na saathi mire dil mein jo nadiyaa bah rahi hai sitaara band muTThi mein milegaa miri taqdir mujh se kah rahi hai mire dil ke akele ghar mein 'raahat' udaasi jaane kab se rah rahi hai"

"baarish ke qatre ke dukh se naa-vaaqif ho tum hanste chehre ke dukh se naa-vaaqif ho tum ne sirf bichhaD jaane kaa karb sahaa hai paa kar kho dene ke dukh se naa-vaaqif ho ek hi chhat ke niche rahte hain ham lekin tum mere lahje ke dukh se naa-vaaqif ho saath kisi ke rah kar jo tanhaa kaTtaa hai tum aise lamhe ke dukh se naa-vaaqif ho haathon ki chuDi ki zabaan samajh lete ho phaile hue gajre ke dukh se naa-vaaqif ho jo manzil tak jaa ke aur kahin muD jaae tum aise raste ke dukh se naa-vaaqif ho"