Ghazal

kisi ko naaz-e-khirad hai kisi ko fakhr-e-junun

main apne dil kaa fasaana kahun to kis se kahun

na iztiraab mein lazzat na aarzu-e-sukun

koi kahe ki main ab kyaa fareb khaa ke jiyun

· · ·

'aaali' ji ab aap chalo tum apne bojh uThaae

saath bhi de to aakhir pyaare koi kahaan tak jaae

jis suraj ki aas lagi hai shaayad vo bhi aae

tum ye kaho khud tum ne ab tak kitne diye jalaae

· · ·

kab tum bhaTke kyuun tum bhaTke kis kis ko samjhaaoge

itni duur to aa pahunche ho aur kahaan tak jaaoge

is chaalis baras mein tum ne kitne dost banaae hain

ab jo umr bachi hai us mein kitne dost banaaoge

· · ·

nahin ki ham ne kabhi haal-e-soz-e-jaan na kahaa

magar ba-hila-e-aaraaish-e-bayaan na kahaa

koi khataa na hui jis ki ye mile paadaash

magar yahi ki zaminon ko aasmaan na kahaa

· · ·

kyaa kyaa diye fareb har ik e'tibaar ne

apnaa banaa diyaa hai tire intizaar ne

kyaa jaane kitne ahl-e-tariqat ko aaj tak

gumraah kar diyaa hai tire rahguzaar ne

· · ·

ye ishq ki galiyaan jin mein ham kis kis aalam mein aae gae

kahti hain ki hazrat ab kaise tum aaj yahaan kyuun paae gae

ik shart hai yaan khushbu-e-vafaa yaad aae to karnaa yaad zaraa

jab tum pe bharosaa thaa gul kaa kyaa mahke kyaa mahkaae gae

· · ·

be-sabab tujh se har ik baat pe naalaan honaa

apnaa pesha hi jo Thahraa hai pareshaan honaa

itni rusvaaiyaan sah li hain to ik ye bhi sahi

ham ko manzur he minnat-kash-e-darbaan honaa

· · ·

hamein milaa na kabhi soz-e-zindagi se faraagh

agar bujhaa hai kahin dil to jal uThaa hai dimaagh

vahi hayaat jo nairang-e-khaar-o-gul hai kabhi

kabhi khilaae tamannaa hai jo na dasht na baagh

· · ·

samajh sakaa na koi raaz-e-husn begaana

juz iin niyaaz-pasandi-e-qalb-e-divaana

ye chaandni ye fazaa ye havaa-e-mai-khaana

davaam ho to mile mujh ko ek paimaana

· · ·

koi bahaar ki khaatir koi khizaan ke liye

bas ek main hi rahaa sirf gulsitaan ke liye

ilaahi mujh se nazar chhin le ki ahl-e-nazar

tamaam-umr taDapte hain raaz-daan ke liye

· · ·

gilaa nahin jo vo begaana-vaar guzre hain

ham aise ahl-e-sukhan be-shumaar guzre hain

taras na khaao miri shiddat-e-tabaahi par

ki umr bhar yahi lail-o-nahaar guzre hain

· · ·

munfail thaa tiraa jalvaa kyaa kyaa

ham ne samjhaa tiraa manshaa kyaa kyaa

ek thaa lafz-e-mohabbat jis se

masale ho gae paidaa kyaa kyaa

· · ·

koi to shakl mohabbat mein saazgaar aae

hansi nahin hai to rone se hi qaraar aae

hai ek neamat-e-uzmaa gham-e-mohabbat bhi

magar ye shart ki insaan ko saazgaar aae

· · ·

taa-abad ek hi charchaa hogaa

koi ham saa koi tum saa hogaa

isi taarik zamin kaa manzar

chaand par chaandni jaisaa hogaa

· · ·

'aali' jis kaa fann-e-sukhan mein ik andaaz niraalaa thaa

naqd-e-sukhan mein zikr ye aayaa dohe paDhne vaalaa thaa

jaane kyuun logon ki nazrein tujh tak pahunchein ham ne to

barson baad ghazal ki rau mein ik mazmun nikaalaa thaa

· · ·

khudaa kahungaa tumhein naakhudaa kahungaa tumhein

pukaarnaa hi paDegaa to kyaa kahungaa tumhein

miri pasand mire naam par na harf aae

bahut hasin bahut baa-vafaa kahungaa tumhein

· · ·

agli gali mein rahtaa hai aur milne tak nahin aataa hai

kahtaa hai takalluf kyaa karnaa ham tum mein to pyaar kaa naataa hai

kahtaa hai ziyaada milne se vaadon ki khalish baDh jaaegi

kuchh vaade vaqt pe bhi chhoDo dekho vo kyaa dikhlaataa hai

· · ·

ye jo baDhti hui judaai hai

shaayad aaghaaz-e-be-vafaai hai

tu na badnaam ho usi khaatir

saari duniyaa se aashnaai hai

· · ·

begaana-e-qayud-e-bahaar-o-khizaan rahe

yaarab miraa junun-e-mohabbat javaan rahe

ye bhi samajh saki hai na ab tak nigaah-e-shauq

tum ne kahaan fareb diyaa aur kahaan rahe

· · ·

bayaan-e-dard-e-mohabbat jo baar baar na ho

koi naqaab tire rukh ki parda-daar na ho

salaam-e-shauq ki jurat se dil laraztaa hai

kahin mizaaj giraami pe ye bhi baar na ho

· · ·

bhaTke hue aali se puchho ghar vaapas kab aaegaa

kab ye dar-o-divaar sajeinge kab ye chaman lahraaegaa

suukh chale vo ghunche jin se kyaa kyaa phuul ubharne the

ab bhi na un ki pyaas bujhi to ghar jangal ho jaaegaa

· · ·

tumhein mujh mein kyaa nazar aa gayaa jo miraa ye ruup banaa gae

vo tamaam log jo 'ishq the vo mire vujud mein aa gae

na tire sivaa koi likh sake na mire sivaa koi paDh sake

ye huruf-e-be-varaq-o-sabaq hamein kyaa zabaan sikhaa gae

· · ·

umr-bhar chaara-e-junun na huaa

ab ye kyaa sochiye ki kyuun na huaa

nahin maalum kyuun tabiat mein

aaj rone se kuchh sukun na huaa

· · ·

ba-in gudaaz ajab rang kaa bayaan hotaa

koi raqib jo apne bhi darmiyaan hotaa

jhukaa huaa hai jo sar aaj tere qadmon par

agar na vaqt bigaDtaa to aastaan hotaa

· · ·