Ghazal

"aati hai zindagi mein khizaan bhi bahaar bhi sehn-e-chaman mein phuul bhi hote hain khaar bhi naaraazgi na ho to mohabbat hai be-maza hasti khushi bhi gham bhi hai nafrat bhi pyaar bhi be-e'tinaaiyon mein bhi hai chaashni kaa lutf hotaa hai iltifaat kabhi naagavaar bhi chhoDaa na khauf-e-hijr ne daaman tamaam raat aaghosh-e-pur-sukun mein thaa dil be-qaraar bhi armaan kaa khuun samaaj ki talvaar ne kiyaa majbur maslahat se huaa ikhtiyaar bhi mehnat ki sakht dhuup mein pipal ki chhaanv mein hai dasht-e-gham mein abr-e-karam ki phuvaar bhi har-chand be-daregh bahaa khun-e-aarzu lekin huaa hai daaman-e-dil laala-zaar bhi ganjina-e-sifaat hai us ki har ek baat surat bhi guftugu bhi adaa bhi shiaar bhi angur ke ye baagh lab-e-ju ye chahchahe hogaa yahin kahin pe hamaaraa mazaar bhi 'jaami' pe kyaa banegi khudaa jaane hashr mein jannat ki aarzu hai gunaahon se pyaar bhi"

"aaj kuchh kahne ko thi shokhi-e-tadbir miri hans paDi paas khaDi thi kahin taqdir miri TuTte hi se hui dil mein kashaakash paidaa meri takhrib mein poshida thi taamir miri hurriyat zulmat-e-zindaan mein janam leti hai inqilaabaat ki taarikh hai zanjir miri apni jaanib kabhi dekhaa hi nahin thaa varna vusatein donon jahaanon ki hain jaagir miri dosti kaisi rah-o-rasm-e-umumi bhi gai pyaar ki baat kahi aap se taqsir miri main kahaan aap kahaan diid ki ummid kahaan yaad aauun jo kabhi dekhiye tasvir miri ibrat-aamoz hai duniyaa kaa taghayyur 'jaami' mujh se milti nahin do roz ki tasvir miri"

"dil mein un ko basaa ke dekh liyaa aag ghar mein lagaa ke dekh liyaa zindagaani vabaal-e-dosh hui dil ki baaton mein aa ke dekh liyaa ashk bhar laai hain miri aankhein us ne jab muskuraa ke dekh liyaa aur ab kis kaa e'tibaar karein dil ko apnaa banaa ke dekh liyaa un ki aadat hai muskuraa denaa ham ne aansu bahaa ke dekh liyaa ham ko jaadu kaa e'tibaar na thaa un se nazrein milaa ke dekh liyaa ghuncha-e-dil kabhi khilaa hi nahin baarhaa muskuraa ke dekh liyaa ikhtisaar-e-javaab ke qurbaan muskuraa muskuraa ke dekh liyaa kaam aati nahin vafaa 'jaami' baarhaa aazmaa ke dekh liyaa"

"dil ko bachaa ke laae the saare jahaan se ham aakhir mein choT khaa gae ik mehrbaan se ham be-fikryon kaa raaj ho rassa-kashi ke saath vo madrasa hayaat kaa laaein kahaan se ham ab gard bhi hamaari na paaeinge qaafile aage nikal gae hain bahut kaarvaan se ham apnaa shumaar hi nahin phulon mein baagh ke aise mein kyaa umiid karein baaghbaan se ham 'jaami' vatan mein apne musaafir thi zindagi london mein bin-bulaae hue mehmaan se ham"

"ab apne des ki aab-o-havaa ham ko nahin bhaati ghulaami ek zillat thi saraapaa dard aazaadi qayaadat karne vaalon ko masihaai kaa daavaa thaa kisi ne lekin ab tak qaum ki biiDi nahin kaaTi abhi tak paanv se chimTi hain zanjirein ghulaami ki din aa jaataa hai aazaadi kaa aazaadi nahin aati unhin aqvaam ke rahm-o-karam par ab bhi jiite hain ghurur-e-hurriyat ne jin se haasil ki thi aazaadi bajaa-e-fikr-e-nau rajat-pasandi aam sheva hai haqiqat mein musalmaan har jagah hai kushta-e-maazi karachi mein muhaajir aur inglistaan mein kaale tiri taqdir mein 'jaami' likhi hai khaana-barbaadi"

"har taar-e-nafas khaar hai maalum nahin kyuun aasaan bhi dushvaar hai maalum nahin kyuun sau baar marun aur jiyun tab unhein paaun dil is pe bhi tayyaar hai maalum nahin kyuun sau tarah ke aaraam mayassar sahi lekin dil jiine se bezaar hai maalum nahin kyuun jo lazzati-e-jaur-o-jafaa thaa usi dil par ik shokh-nazar baar hai maalum nahin kyuun ik baar mili un se nazar pi nahin koi phir bahki si raftaar hai maalum nahin kyuun sau jaan se ham jis pe fidaa hote hain din-raat vo darpai-e-aazaar hai maalum nahin kyuun 'jaami' vo mukhaatab hain magar arz-e-tamannaa phir bhi mujhe dushvaar hai maalum nahin kyuun"

"kyaa karein tadbir-e-vahshat ai dil-e-divaana ham us se mil bhi to nahin sakte hain aazaadaana ham ham rahein duuri kash-e-mai ghair mast-e-arghavaan aaj Takraa deinge har paimaane se paimaana ham DhunDh legaa aap manzil kaarvaan-e-zindagi ghair kaa ehsaan kyuun lein himmat-e-mardaana ham lab rahe khaamosh lekin saari baatein ho gaiin ik nazar mein kah gae afsaana-dar-afsaana ham jis tarah insaan ko le Duube hain shaikh-o-barhaman laao saaghar mein Dubo dein masjid-o-but-khaana ham jis ko duniyaa mein kisi ne munh lagaayaa hi nahin mahfil-e-rindaan mein hain TuuTaa huaa paimaana ham kaash koi dekh hi letaa nigaah-e-lutf se aae the mahfil mein 'jaami' kitne mushtaaqaana ham"

"javaan thaa dil na thaa andesha-e-sud-o-ziyaan pahle vo the kyaa mehrbaan saaraa jahaan thaa mehrbaan pahle koi manzil ho himmat chaahiye sar ho hi jaati hai magar luTte hain raste mein hazaaron kaarvaan pahle vo mir-e-kaarvaan bhi ik na ik din ho ke rahte hain jinhon ne muddaton chhaani hai khaak-e-kaarvaan pahle khudi jaagi uThe parde ujaagar ho gaiin raahein nazar kotaah thi taarik thaa saaraa jahaan pahle vahi barq-e-tajalli shama hai mere shabistaan ki na laa sakti thi jis ki taab shaakh-e-aashiyaan pahle huun ab bhi paa-ba-gil taaham bahut parvaaz ki main ne vo ab meri zamin hai thaa jo meraa aasmaan pahle nihaan thiin dar-ba-dar ki Thokaron mein azmatein 'jaami' na thaa is darja aaali teraa andaaz-e-bayaan pahle"

"lutf zindagaani kaa shauq-e-aarzu mein hai jazba-o-junun mein hai sai-o-justuju mein hai jo sukun-e-khaatir hai us ke aib mein dilkash chaashni hai luknat hai sehr guftugu mein hai us ke qurb ki lazzat mujh se kyaa bayaan hogi be-panaah kaifiyyat sirf aarzu mein hai zahr zindagaani kaa pi ke aql aai hai daaru-e-gham-e-hasti talkhi-e-subu mein hai bhiiD mein zamaane ki ham sadaa akele the vo bhi duur hai kitnaa jo rag-e-gulu mein hai baat 'jaami'-saahib ki talkh bhi hai shirin bhi dard halkaa halkaa saa tarz-e-guftugu mein hai"

"us ki chashm-e-karam thi hayaat-aafrin khushk patton pe jaise nikhaar aa gayaa aarzu ke shagufe mahakne lage dil ki be-chainiyon ko qaraar aa gayaa dasht-e-ghurbat mein bhi zaanu-e-dost par meri tanhaai ko ye taassur huaa bhulaa-bhaTkaa huaa ik musaafir koi yak-ba-yak jaise apne dayaar aa gayaa umr-bhar fikr-e-duniyaa mein ghaltaan rahe maare maare phire muft rusvaa hue zindagi dafatan zindagi ban gai chaar aankhein huiin dil mein pyaar aa gayaa baankpan un kaa mashhur thaa meri divaangi par hamesha hanse lekin aankhon se aansu chhalakne lage saamne jab hamaaraa mazaar aa gayaa jaantaa huun kudurat buri chiiz hai aap se dushmani ki tavaqqo na thi duur honaa bahut is kaa dushvaar hai dil ke aaine mein jab ghubaar aa gayaa zakhm bharne lage dard tham saa gayaa ik sahaaraa milaa dil ko Dhaaras bandhi us ke qaul-o-qasam mein bhi ik baat thi jo bhi us ne kahaa e'tibaar aa gayaa"