Ghazal

"Thikaanaa ho na ho phir bhi Thikaanaa DhunD lete hain qafas mein rah ke bhi ham aashiyaana DhunD lete hain kitaab-e-dil mein vo gham ko chhupaa leinge to kyaa hogaa magar ham dard-o-gham kaa har khazaana DhunD lete hain kabhi un ko sahaare ki zarurat hi nahin paDti parinde khud-ba-khud apnaa Thikaanaa DhunD lete hain zamaane ki nazar mein qatra-e-shabnam sahi lekin kuchh aise hain jo ashkon mein fasaana DhunD lete hain ghizaa hanson ko moti ki koi laa kar nahin detaa vo khud sipon ke andar apnaa daana DhunD lete hain miri tanhaaiyon kaa zikr jab un tak nahin pahunchaa to kis ki rahbari se vo Thikaanaa DhunD lete hain jab un kaa naam apni ruuh mein gudvaa liyaa 'svaami' to phir kyon tark-e-ulfat kaa bahaana DhunD lete hain"

"gham zamaane se chhupaanaa hi paDaa rote rote muskuraanaa hi paDaa dil ko dil se bhi bachaanaa hi paDaa ye bhi gham mujh ko uThaanaa hi paDaa saazishi tirchhi nazar thi kyaa kahein choT khaa kar muskuraanaa hi paDaa pi sabhi ne main hi tishna thaa magar saath un ke laDkhaDaanaa hi paDaa un ki rusvaai ne jab gheraa mujhe mujh ko un se duur jaanaa hi paDaa zindagi ko aur kab tak jheltaa maut se panjaa laDaanaa hi paDaa aansuon ne is tarah tartib di gham kaa har qissa sunaanaa hi paDaa intihaa-e-ishq mein khaae fareb chaah kar bhi bhuul jaanaa hi paDaa tirgi thi aur un ki yaad thi dil ko aise mein jalaanaa hi paDaa haal-e-dil un se chhupaate kab talak raaz ulfat kaa bataanaa hi paDaa 'svaami' un ki zid ke aage jhuk gae bijliyon par ghar banaanaa hi paDaa"

"aag siine mein mohabbat ki lagaate kyon hain jab unhein chhoD ke jaanaa hai to aate kyon hain ham jab insaan ki taarif mein aate hi nahin phir hamein log kaleje se lagaate kyon hain duur kaaba to hai bandon ki ibaadat ke liye phir ye taamir-shuda ghar ko giraate kyon hain kaanch kaa ghar na shajar hai koi aangan mein mire dosto sang mire ghar mein phir aate kyon hain jab unhein mujh se mohabbat hi nahin hai 'svaami' phir miraa naam vo likh likh ke miTaate kyon hain"

"dil par jo tiri yaad kaa pahraa nahin hotaa saagar ki tarah zakhm bhi gahraa nahin hotaa khvaabon kaa bahut dekhnaa achchhaa nahin hotaa har khvaab yaqinan kabhi sachchaa nahin hotaa marzi hai miri jis ko bhi chaahun use dekhun aankhon pe kisi zaat kaa pahraa nahin hotaa lillaah tabibon ko dikhaate ho mujhe kyon is TuuTe hue dil kaa mudaavaa nahin hotaa niklaa hai kahaan ret mein tu pyaas bujhaane sahraa mein jo dikhtaa hai vo dariyaa nahin hotaa honTon ko nujumi ke jo siinaa hai to si do taqdir kaa likkhaa kabhi jhuTaa nahin hotaa koi na agar chhintaa bachche kaa nivaalaa vo peT pakaD kar kabhi soyaa nahin hotaa 'svaami' zaraa suraj ko samundar se nikaalo thak-haar ke yuun Dubnaa achchhaa nahin hotaa"

"vo nahin hai to kyaa jiyaa jaae zindagi teraa kyaa kiyaa jaae kaun suntaa hai aap ki naaseh honT achchhaa hai si liyaa jaae is se pahle koi duaa maangein chaak-e-daaman ko si liyaa jaae tishnagi kyaa bujhaaegi ye mai ashk-e-gham ko hi pi liyaa jaae"

"kyaa ghaTaa aasmaan pe chhaai hai jaise bhar kar sharaab laai hai maut se kar ke dil-lagi ham ne zindagi se najaat paai hai thaame rakkhaa tiri nigaahon ne naav jab meri Dagmagaai hai rashk karne lagi hai baad-e-sabaa jab khizaan par bahaar aai hai mai se tauba to kar chuke the huzur tishnagi aap ne baDhaai hai ek bachche ki muskuraahaT mein kyaa muqaddas kitaab paai hai khat vo 'svaami' paDhe nahin jaate buund aansu ki jin mein paai hai"

"sakhaavaton ke bahaane se chhal rahe hain log na jaane kaun se saanche mein Dhal rahe hain log masarratein na jinhein raas aaiin auron ki ghamon ki dhuup mein baiThe pighal rahe hain log jo khud-parast hain insaan mafaad ke paikar unhin ke makr farebon mein Dhal rahe hain log kahaan main aa gayaa is bazm mein sukun ke liye yahaan to aap hi aapas mein jal rahe hain log na jaane kaun si mushkil mein phans gai duniyaa misaal-e-aatish-e-khaamosh jal rahe hain log vo niim vaali gali ab nazar nahin aati tamaam shahr kaa naqsha badal rahe hain log zaraa tu ghar se nikal kar to dekh duniyaa ko har ek gaam pe 'svaami' badal rahe hain log"

"zindagi khaar hai gulaab bhi hai zindagi zindagi hai khvaab bhi hai pyaar gangaa ki tarah hai lekin pyaar sahraaon kaa saraab bhi hai kisi insaan ki madad ke liye jhuuT kaa bolnaa savaab bhi hai muskuraahaT to dekh bachchon ki is se behtar koi kitaab bhi hai is siyaahi pe tu yaqin mat kar is andhere mein aaftaab bhi hai chhu ke dil us ne haath ko chumaa is adaa kaa koi javaab bhi hai baat 'svaami' ki talkh hai phir bhi baat socho to laa-javaab bhi hai"