Ghazal

"khulus-e-taamir ho jo shaamil sitam kaa jazba buraa nahin hai vafaa kareinge vo kyaa kisi se jinhein shuur-e-jafaa nahin hai tiri samajh mein na aa sakegi kisi ke ashkon ki qadr-o-qimat abhi hai naa-aashnaa-e-gham tu abhi tiraa dil dukhaa nahin hai vafaa ki azmat se aashnaa hain kahein to rudaad-e-gham kahein kyaa tujhe nadaamat ho jis ko sun kar vo daastaan-e-vafaa nahin hai khudaa-na-karda tumhaare dil ko koi dukhaae to kyaa karoge nigaahein tum ne to aisi pherin ki jaise meraa khudaa nahin hai vo khoyaa khoyaa saa un kaa aalam labon pe halki si muskuraahaT adaa ye un ki 'matin' jaise sunaa bhi hai aur sunaa nahin hai"

"kabhi kabhi to mohabbat ki zindagi ke liye khud un ko ham ne ubhaaraa hai barhami ke liye kiyaa hai kaam baDaa zindagi mein ashkon ne diye jalaae shab-e-gham mein raushni ke liye vo aaj bhi hain usi tirgi ki manzil mein ujaalaa maang ke laae jo raushni ke liye adaa-e-jaur-e-mohabbat mein naagavaar nahin khulus chaahiye ai dost barhami ke liye ye daur vo hai ki apne hain ghair se bad-tar kaleja chaahiye apnon se dosti ke liye dalil-e-azmat-e-insaan hai ye nizaam-e-jahaan zamin hai gardish-e-paiham mein aadmi ke liye hamaare haal-e-pareshaan pe kaash ek nazar bhare hain ruup ye ham ne tiri khushi ke liye ye zindagi bhi ajab zindagi hai kyaa kahiye 'matin' Thokarein khaate hain ham khushi ke liye"

"haae urdu ye siyaasat tiri jaagir ke saath koi 'ghaalib' kaa taraf-daar koi 'mir' ke saath zindagi ek safar khauf ki zanjir ke saath maut ik khvaab-e-giraan hashr ki taabir ke saath har adaa husn ki mahfuz hai taasir ke saath bolti chalti thirakti hui tasvir ke saath zabt ki had se guzar kar bhi duaa kartaa huun shikva-bar-lab huun magar jazba-e-taamir ke saath jaani-pahchaani hui shakl bhi mubham si lage zindagi kaa ye fusun apni hi tasvir ke saath ab to Thokar bhi lage to nahin uThti jhankaar pahle aavaaz thi har jumbish-e-zanjir ke saath dida-e-said se aagaah na dil se vaaqif ajnabi kaun hai tarkash mein tire tiir ke saath apni qismat ke jo maalik hain ye un se puchho rabt tadbir ko hotaa hai jo taqdir ke saath faiz-e-mausam hi sahi sehr-e-taghayyur hi sahi barq girti hai magar aah ki taasir ke saath apni tasvir se ik ishq saa hotaa hai 'matin' ye junun aur fuzun hotaa tashhir ke saath"

"gham-e-insaan ki sajaai hui duniyaa huun main anjuman mere tasavvur mein hai tanhaa huun main tapish o dard ke asraar se vaaqif huun magar mujh ko ye zoam nahin hai ki masihaa huun main jaane kyaa shai mire siine mein bhari hai aisi sham-e-sozaan ki tarah jaltaa pighaltaa huun main na kashish huun main zamin ki na huun paani kaa uchhaal zarre uDtaa huaa bahtaa huaa dariyaa huun main roz paighaam-e-mohabbat mujhe deti hai hayaat raah-e-dushvaar se aasuda guzartaa huun main chaarasaazi gham-e-insaan ki hai buniyaad-e-amal zindagi hai yahi jis ke liye jiitaa huun main pairvi-e-havas-e-khaam na hogi mujh se maqsad-e-zaabta-e-ishq samajhtaa huun main asr-e-haazir ke numaainda hain mere ashaar gham-e-insaan ko taghazzul mein samotaa huun main jazba-e-khidmat-e-insaan hai 'matin' aab-e-hayaat shukr-sad-shukr ai ehsaas ki achchhaa huun main"

"aadmi aur dard se naa-aashnaa mumkin nahin aks se khaali ho koi aaina mumkin nahin aadmi insaan-e-kaamil ban to saktaa hai magar zindagi bhar rah sake vo paarsaa mumkin nahin do kinaare jaise dariyaa ke nahin milte kabhi ham se iqdaam-e-jafaa un se vafaa! mumkin nahin kaar-farmaa jab rahe barq-e-nazar aaThon pahar shahr bhar mein ho na koi haadsa! mumkin nahin kis qadar himmat-shikan hai gumrahi kaa ye javaaz rahbari az-ibtidaa taa-intihaa mumkin nahin shisha koi chuur ho jaae to phir kis kaam kaa miT ke ho aabaad aivaan-e-vafaa mumkin nahin aap patthar ko nichoDein is se kyaa haasil 'matin' tang-dil insaan ho haq-aashnaa mumkin nahin"

"ham jo insaan ke gham uThaate hain khuub ko khub-tar banaate hain zindagi khvaab hi sahi lekin khvaab taabir chhoD jaate hain be-haqiqat masarraton ke liye zindagi bhar fareb khaate hain maangte hain duaaein jiine ki aur jiinaa hi bhuul jaate hain sochi-samjhi vahi tamannaaein roz khaake nae banaate hain aap se yaad aap ki achchhi aap to ham ko bhuul jaate hain kaarvaan-e-hayaat mein khud ko har qadam ajnabi saa paate hain jab bhi bantaa hai koi shish-mahal kitne aaine TuuT jaate hain zehn-o-dil ki riqaabatein tauba kaise kaise khayaal aate hain dosti kyaa hai khud-sataai hai sab 'matin' apne kaam aate hain"

"yahi justuju kaa kamaal hai yahi aagahi ki talaash hai use samho apni talaash tum jo tumhein kisi ki talaash hai yahi aaina hai vo aaina jo liye hai jalva-e-aagahi ye jo shaaeri kaa shuur hai ye payambari ki talaash hai vo masarraton kaa hujum kyaa jo tavaaf-e-ishq-o-tarab kare vo khushi jo auron ko de sakun mujhe us khushi ki talaash hai ye jo pastiyaan hain uruuj ki ye tabaahiyaan jo hain zehn ki koi raahbar hai to aae phir unhein raahbari ki talaash hai miri zindagi miri shaaeri hai haqiqaton kaa ik aaina ye 'matin' gham jo aziiz hai ye miri kabhi ki talaash hai"

"tanhaa tiraa khudaa nahin ai aashnaa-e-raaz teraa bhi kaarsaaz hai meraa bhi kaarsaaz kyaa kahiye rahguzaar-e-mohabbat ki daastaan jo dushman-e-sukun hai vo hai meraa chaarasaaz ai jaan-e-muddaaa miri jannat miri hayaat teraa khayaal teri tamannaa miri namaaz naghme bhi hain pasand mujhe soz bhi aziiz sarmaaya-e-vafaa hai miri zindagi kaa saaz kyaa din dikhaae dekhiye insaan ki sar-kashi sajdon se paa rahaa huun jabinon ko be-niyaaz paighaam-e-zindagi hai mohabbat ki har adaa yaani gunaahgaar-e-mohabbat hai paak-baaz insaaniyat hai marg-e-musalsal se ham-kanaar maango duaa hayaat rahe gham se sarfaraaz ab tak hain yaad mujh ko vo paiham tajalliyaan kitnaa nazar-navaaz thaa har manzar-e-hijaaz mujh ko 'matin' naaz hai apne nasib par main banda-e-nasir huun main khaadim-e-niyaaz"

"taghayyuraat se kab rabt-e-gulsitaan na rahaa bahaar aai to kyaa khatra-e-khizaan na rahaa jabin jhukaai to jannat kharid li jaise samajh rahe hain ki ab koi imtihaan na rahaa fazaa mein guunj rahi hain kahaaniyaan gham ki hamin ko hausla-e-sharh-e-daastaan na rahaa unhein to hashr mein bhi hai khayaal-e-rusvaai hamein khushi hai koi parda darmiyaan na rahaa gham-e-maaal gham-e-zindagi gham-e-dauraan hamaare ishq kaa charchaa kahaan kahaan na rahaa havaa palaTte hi har zakhm ho gayaa taaza bahaar-e-ishq ko andesha-e-khizaan na rahaa 'matin' qadr hui aah kab nasheman ki chaman mein barq ke laaeq jab aashiyaan na rahaa"