Ghazal

apne naale mein gar asar hotaa

qatra-e-ashk bhi guhar hotaa

jin ke naame ki hai pahunch tujh tak

kaash main un kaa naama-bar hotaa

· · ·

hamein kaun puchhe hai saahibo na savaal mein na javaab mein

na to koi aadmi jaane hai na hisaab mein na kitaab mein

na to ilm apne mein hai yahaan ki khudaa ne bhejaa hai kis liye

isi ko jo kahte hain zindagi so to jism ke hai azaab mein

· · ·

jis kaa tujh saa habib hovegaa

kaun us kaa raqib hovegaa

be-vatan be-rafiq be-asbaab

kaun aisaa gharib hovegaa

· · ·

ghamza-e-chashm sharmsaar kahaan

sar to haazir hai tegh-e-yaar kahaan

gul bhi kartaa hai chaak apnaa jaib

par garebaan saa taar taar kahaan

· · ·

ushshaaq tere sab the par zaar thaa so main thaa

jag ke kharaaba andar ik khvaar thaa so main thaa

daakhil shahidon mein to lohu lagaa ke sab the

shamshir-e-naaz se pur-afgaar thaa so main thaa

· · ·

kaabe hi kaa ab qasd ye gumraah karegaa

jo tum se butaan hogaa so allaah karegaa

zulfon se paDaa tuul mein ab ishq kaa jhagDaa

khat aan ke ye majhla kotaah karegaa

· · ·

ye teraa ishq kab kaa aashnaa thaa

kahaan kaa jaan ko meri dharaa thaa

vo saaat kaun si thi yaa ilaahi

ki jis saaat do-chaar us se huaa thaa

· · ·

jitnaa koi tujh se yaar hogaa

utnaa hi kharaab o khvaar hogaa

har roz ho roz-e-id to bhi

tu mujh se na ham-kanaar hogaa

· · ·

tu ham se jo ham-sharaab hogaa

bahuton kaa jigar kabaab hogaa

DhunDhegaa sahaab chhupne ko mehr

jis roz vo be-naqaab hogaa

· · ·

aah main be-qaraar kis kaa huun

kushta-e-intizaar kis kaa huun

tiir saa dil mein kuchh khaTaktaa hai

dekhiyo main shikaar kis kaa huun

· · ·

agar main jaantaa hai ishq mein dhaDkaa judaai kaa

to jiite ji na letaa naam hargiz aashnaai kaa

jo aashiq saaf hain dil se unhin ko qatl karte hain

baDaa charchaa hai maashuqon mein aashiq-aazmaai kaa

· · ·

tiraa ham ne jis ko talabgaar dekhaa

use apni hasti se be-zaar dekhaa

adaa hi ki hasrat mein sab mar gae sach

tajalli ko kis ne ba-takraar dekhaa

· · ·

paas rah kar dekhnaa teraa baDaa armaan hai

mujh ko sab mushkil hai pyaare tujh ko sab aasaan hai

ai mire badmast mat kar tu ghazaalon kaa shikaar

le na mere dil ko chakh ye zor hi biryaan hai

· · ·

naaseho dil kis kane hai kis ko samjhaate ho tum

kyuun divaane ho gae ho jaan kyuun khaate ho tum

mujh se kahte ho ki main hargiz nahin piitaa sharaab

main tumhaaraa dost yaa dushman ki sharmaate ho tum

· · ·

jo ham se tu milaa karegaa

banda tujh ko duaa karegaa

bosa tu de kabhu miri jaan

maulaa tiraa bhalaa karegaa

· · ·

mohabbat munh pe karnaa aur dil mein bevafaai hai

ye aaina yahaan kahtaa hai kaisi aashnaai hai

bhalaa bosa ham us se aaj maangeinge kisi Dhab se

tavaqqo to nahin lekin ye taale aazmaai hai

· · ·

husn ki gar zakaat paaun main

to bhikaari tiraa kahaaun main

ek bosa do dusraa tauba

phir jo maangun to maar khaaun main

· · ·