Ghazal

jabin-e-dil pe nadaamat kaa daagh rahtaa hai

falak pe us kaa hamesha dimaagh rahtaa hai

gul-o-samar se ladaa hai har ik shajar lekin

gayaa hai kaun ki maghmum baagh rahtaa hai

· · ·

soch apni badal rahaa huun main

kaf-e-afsos mal rahaa huun main

jo masarrat ko maat deti hai

fikr mein aisi Dhal rahaa huun main

· · ·

balaa-e-jaan hai samar bad-havaas hone kaa

natija dekh lo tum khud udaas hone kaa

khat-e-muhit hai hablul-varid ke hai qarib

yaqin rakh tu use apne paas hone kaa

· · ·

dete hain jis ko khun-e-jigar kam bahut hi kam

aate hain us shajar pe samar kam bahut hi kam

baaqi hain ab bhi dil pe mire zakhm-e-haadsaat

ehsaas-e-dard to hai magar kam bahut hi kam

· · ·

baais-e-raahat-e-dil meraa muqaddar niklaa

jis ko samjhaa thaa bayaabaan vo miraa ghar niklaa

husn-e-maasum ki taqdis ko rusvaa na kiyaa

jitnaa ilzaam hai khush huun ki mire sar niklaa

· · ·

mausam-e-hijr ki dil-soz nishaani degaa

ishq kaa dard hi unvaan-e-kahaani degaa

sang-e-be-maaya hai shak aur yaqin hai gauhar

vaqt-e-taqrir yahi shola-bayaani degaa

· · ·

dafatan ho gai gul sham-e-vafaa tere baad

khaana-e-dil mein ujaalaa na huaa tere baad

mausam-e-josh-e-junun mein huaa paamaal chaman

le uDi khushbu-e-gul baad-e-sabaa tere baad

· · ·

marbut kaamyaabi hai vaarastagi ke saath

rakh raah-e-pur-khatar mein qadam pukhtagi ke saath

pyaasaa taDap rahaa huun main dariyaa ke paas bhi

hai intihaa-e-zulm miri tishnagi ke saath

· · ·

dekhiye andaaz us ki shokhi-e-tahrir kaa

pairahan hi khaak hai har paikar-e-tasvir kaa

zarb se us ki laraztaa hai dil-e-sang-e-jabal

tesha-e-azm-o-yaqin zaamin hai ju-e-shir kaa

· · ·

alam kaa bojh uThaae safar mein rahtaa hai

jo bad-nasib miri chashm-e-tar mein rahtaa hai

vafaa ki bhiik koi zar-parast kyaa degaa

kasir faaeda us ki nazar mein rahtaa hai

· · ·

shahr-e-mazlum mein ik shakhs bhi barham na milaa

khauf itnaa thaa koi paikar-e-maatam na milaa

maan luun kaise khilegaa gul-e-ummid miraa

barg-e-ulfat pe mujhe qatra-e-shabnam na milaa

· · ·

ye kaisaa zulm-o-sitam bad-qimaash kartaa hai

vo be-gunaah kaa dil paash-paash kartaa hai

sukun-e-qalb se vo shakhs ho gayaa mahrum

havas ki qaid mein fikr-e-maaash kartaa hai

· · ·

hujum-e-gham mein bahar-haal muskuraanaa hai

havaa ke rukh pe charaagh-e-yaqin jalaanaa hai

hai dil-kharaash bahut yaad mere maazi ki

use harim-e-ghazal mein mujhe sajaanaa hai

· · ·

yuun mukaafaat-e-amal sab kuchh uThaa kar le gayaa

sar-phiraa sailaab basti ko bahaa kar le gayaa

saaya-e-rahmat saron pe un ke rahtaa hai mudaam

jab bhi koi apne dushman ko manaa kar le gayaa

· · ·

mahfuz nahin zauq-e-havas dast-e-fanaa se

qudrat ne navaazaa hai mohabbat ko baqaa se

har harf-e-muqaddas hai haqiqat kaa muhaafiz

mansur hai maatub anal-haq ki sadaa se

· · ·