Ghazal

"aap logon ne jo ye hashr uThaayaa huaa hai is kaa matlab vo mire shahr mein aayaa huaa hai is tarah aankh milaa ke mujhe gumraah na kar tu ne ye she'r to pahle bhi sunaayaa huaa hai pahle khush-baash thaa vo tark-e-ta'alluq kar ke ab mujhe maangne darbaar pe aayaa huaa hai aise inkaar na kar meraa bharam hi rakh le main ne logon ko tire baare bataayaa huaa hai us ne aanaa hai to milnaa hi nahin us se 'munir' saazishi dil ne miraa zehn banaayaa huaa hai"

"aaeinge raah-e-'ishq mein kuchh haadsaat aur dil mujh se kah rahaa hai zaraa ehtiyaat aur bachchon se phir kahaa hai ki gaaDi nahin mili bachchon se phir kahaa hai ki bas ek raat aur pahle bhi tere jud-o-karam se 'ataa hui ai shaah-e-mumkinaat mujhe ek naa't aur vo baat-chit 'ishq pe kartaa to hai magar kahne ki baat aur hai karne ki baat aur ye log jo bhi kahte hain logon ki baat chhoD logon ke saath aur huun main tere saath aur ik dusre ke saath bhi banti na thi 'munir' aur aa gai safar mein achaanak se raat aur"

"rakhte hain mere saath vo yuun bair dekhiye jaise main un ke vaaste huun ghair dekhiye afsos jin ke pairon mein rakhtaa huun apnaa dil rakhte hain mere dil pe vahi pair dekhiye us ne kahaa hai saath nibhaaegaa vo miraa ummid to nahin hai mujhe khair dekhiye dekhein vo shakhs aa ke chalaa to nahin gayaa ulTe lage hue hain yahaan pair dekhiye vo shakhs chal paDaa hai mire saath aakhirash 'anjum' ki saahiwal mein ab sair dekhiye"

"vo aa ke haath pe jis vaqt dil banaati hai mire badan mein haraarat si phail jaati hai tumhaare shahr se guzraa to ye khulaa mujh par havaa mein ‘uud ki khushbu kahaan se aati hai kabhi khayaal mein aati hai jhulti rassi kabhi to rail ki paTri mujhe bulaati hai jo mere lab pe hansi hai baraa-e-duniyaa hai jo meri aankh mein gham hai vo meraa zaati hai tumhaare aane se aayaa hai ab yaqin 'anjum' ye zindagi bhi baDe mo'jize dikhaati hai"

"guftugu kar ke aap ki takiya mujh se kartaa hai dil-lagi takiya raat soyaa thaa tere baazu par aankh kholi to phir vahi takiya meri duniyaa faqat yahin tak hai chaae cigarette sukhanvari takiya ai khudaa tu hi meraa sab kuchh hai avvalin dost aakhiri takiya jo samajhtaa na thaa mujhe kuchh bhi mujh pe karne lagaa vahi takiya ek takiya kharid le 'anjum' god us ki hai 'aarzi takiya"

"aaj bhi us ne sar-e-bazm suni baat nahin aur ye baat mire dost nai baat nahin ghair kaa zikr kiyaa aur kahaa ye hans kar aap jo sochte hain aisi koi baat nahin aap ke vaaste main jaan bhi de saktaa huun aap ke vaaste lekin ye baDi baat nahin ham gae vaqt mein yusuf bhi kahe jaate rahe ye gai baat hai itni bhi gai baat nahin log is vaaste laDte hain mire saath 'munir' main jo har baat pe kahtaa huun koi baat nahin"

"dard hotaa hai to haathon pe uThaa letaa hai meri aankhon se vo ashkon ko churaa letaa hai us ke maqsad ko samajh us ki 'ibaarat pe na jaa 'ishq to naar ko gulzaar banaa letaa hai ye adaa us ki mujhe duur na hone degi ruuTh jaataa huun to siine se lagaa letaa hai ye jo ghurbat mein udaasi kaa sabab hai mat puchh mujh se chhoTaa bhi mujhe chaar sunaa letaa hai baat kirdaar ki kartaa hi nahin hai koi log kahte hain bataa kitnaa kamaa letaa hai mere purkhon kaa lagaayaa huaa ye peD 'munir' mere bachchon ko bhi saae mein biThaa letaa hai"

"kyon guftugu mein lahja-e-tar lag nahin rahaa baaton mein teri aaj asar lag nahin rahaa do chaar miil main tiri jaanib chalun magar do chaar miil kaa ye safar lag nahin rahaa main khub-ru javaan thaa ye maaniye janaab tasvir dekh lijiye gar lag nahin rahaa khun-e-jigar pilaa diyaa is ko magar abhi jaisaa main chaahtaa huun shajar lag nahin rahaa jab se makin-e-qalb ne chhoDaa hai apnaa ghar dil misl-e-reg-zaar hai ghar lag nahin rahaa tere baghair shahr mein har ek se 'munir' main dil lagaa rahaa huun magar lag nahin rahaa"