Ghazal

"khule jo dil ke hain vo baat saaf karte hain haqiqaton kaa vahi e'tiraaf karte hain zaraa si baat pe ahbaab hote hain barham kabhi khataaein bhi dushman muaaf karte hain vo ittihaad ki karte hain baat kis munh se jo paidaa qaum mein khud ikhtilaaf karte hain jinhein hai aaj bhi daavaa chaman-parasti kaa vo saazishein bhi chaman ke khilaaf karte hain baDaa subut hai un ki buland-zarfi kaa khataa jo karke agar e'tiraaf karte hain junun mein farz nahin bhule tere divaane harim-e-naaz kaa teri tavaaf karte hain 'nazar' anaa kaa nasha is qadar hai logon mein ki harf-e-haq se bhi vo inhiraaf karte hain"

"luTi bahaar to nazm-e-chaman pe kyaa guzri na puchhiye ki gulon ke badan pe kyaa guzri tumhaare shahr mein maare gae jise patthar kise hai dard vo divaane-pan pe kyaa guzri nasib ho gayaa us ko maqaam hasti kaa na puchho morid-e-daar-o-rasan pe kyaa guzri shikast-e-jaam ki aavaaz hai gavaah us ki ki mai-kade mein kisi dil-shikan pe kyaa guzri zarur ilm hai is kaa nigaah-e-saaqi ko ki tang-zarfi se tishna-dahan pe kyaa guzri vo ek naaz-e-taghaaful se uTh gae lekin khabar nahin ki bhari anjuman pe kyaa guzri vatan kaa aa gayaa jis dam khayaal ghurbat mein 'nazar' na puchho gharib-ul-vatan pe kyaa guzri"

"us saaz ki aavaaz zaraa bhi nahin aati dil TuTtaa hai aur sadaa bhi nahin aati rang uD gayaa aisaa jo dulhan ho gai beva haathon mein nazar us ke hinaa bhi nahin aati ye hai nai tahzib ki uryaani kaa aalam fakhr is ko samajhne mein hayaa bhi nahin aati raushan vo charaagh apne azaaem se kiyaa hai is samt havaa ki to havaa bhi nahin aati marne se na ghabraao agar haadisa aae marzi na ho rab ki to qazaa bhi nahin aati har baat mein vo ijz ke paikar hain nazar ham lab par kabhi guftaar-e-anaa bhi nahin aati"

"aarzu kab hai tiri anjuman-aaraai ki dosti raas mujhe aai hai tanhaai ki kaun hai baDh ke bujhaae jo sulagte ghar ko aankh rakhti hai ye duniyaa to tamaashaai ki sunne vaalaa nahin mazlum ke dil ki chikhein guunj hai aaj tire shahr mein shahnaai ki rang is gulshan-e-aalam kaa yahaan tak badlaa uD gai bu-e-vafaa bhaai se ab bhaai ki rabt-e-ulfat na baDhaa had se ziyaada naadaan aage naubat kahin aa jaae na rusvaai ki fan kaa khud aaina fankaar huaa kartaa hai kyaa zarurat hai taaaruf ki shanaasaai ki khud ko daanaa bhi samajhnaa hai 'nazar' naadaani aajizi asl mein pahchaan hai daanaai ki"

"chalegaa kaun mire saath ham-safar ki tarah kisi ki raah nahin meri rahguzar ki tarah mire yaqin kaa is mein qusur hi kyaa hai fareb-saaz mile mujh ko mo'atabar ki tarah na imtiyaaz rahaa kam-nazar zamaane ko dikhaai dete hain sab aib bhi hunar ki tarah vo koi shish-mahal ho ki qasr-e-shaahi ho gharib ko na milegaa sukun ghar ki tarah nahin khulus kaa meaar shahr mein tere yahaan zamir kaa saudaa hai maal-o-zar ki tarah mile zarur tire aastaan ko sar laakhon magar taDap na kisi mein hai mere sar ki tarah chamakte kaanch ke TukDe fareb dete hain 'nazar' ke saamne aate hain vo guhar ki tarah"

"talaash-o-fikr mein nazron ki hairaani nahin jaati jo manzil se guzartaa huun vo pahchaani nahin jaati ajab dastur-e-aalam hai ajab insaaf-e-duniyaa hai salib-o-daar par haq baat bhi maani nahin jaati zamaane ki sadaaein aap to pahchaan lete hain mire hi dard ki aavaaz pahchaani nahin jaati mataa-e-zindagi luT jaaegi maalum hai lekin havas vaalon ki hirs-e-daulat-e-faani nahin jaati hue qasr-o-mahal taamir jin ke dam se duniyaa mein unhin ki aaj dekho khaana-viraani nahin jaati zaruri hai koi hal DhunDhnaa tadbir se is kaa pareshaani ke kahne se pareshaani nahin jaati 'nazar' khud-e'timaadi ik dalil-e-kaamyaabi hai kabhi khaali kisi ki sai-e-imkaani nahin jaati"

"kisi se koi na puchhe mizaaj kaisaa hai tumhaari bazm kaa jaane rivaaj kaisaa hai kisi tarah bhi na zakhm-e-jigar bhare ab tak na puchho zakhm hain kaise ilaaj kaisaa hai sukun nasib nahin raushni mein hiron ki kisi nasib mein hiron kaa taaj kaisaa hai baDe khulus se kal tak gale jo miltaa thaa chhupaae haath mein khanjar vo aaj kaisaa hai hue samaaj mein paidaa samaaj ke dushman jadid daur kaa dekho samaaj kaisaa hai pahunch saki dar-e-insaaf par na jab aavaaz jafaa-e-vaqt pe ye ehtijaaj kaisaa hai"

"taDap hayaat se baaham nahin to kuchh bhi nahin khushi ke saath agar gham nahin to kuchh bhi nahin hazaar roiye haal-e-tabaah par apne kisi ki aankh agar nam nahin to kuchh bhi nahin tumhaari baat masihaa-sifat sahi lekin hamaare zakhm kaa marham nahin to kuchh bhi nahin ghalat hai khuun ke aansu bahaanaa marne par jo zinda laash kaa maatam nahin to kuchh bhi nahin hazaar rang se mahfil sajaa ke tum dekho tumhaare saath agar ham nahin to kuchh bhi nahin chaman ko naaz na ho jis pe vo bahaar hi kyaa agarche phuul pe shabnam nahin to kuchh bhi nahin 'nazar' zarur hai haathon mein un ke jaam magar 'nazar' mein kaif kaa aalam nahin to kuchh bhi nahin"