Ghazal

"apnaa apnaa hausla thaa faasle tai kar gayaa vo jo kal tak ji rahaa thaa hanste hanste mar gayaa ro rahaa thaa aaina be-chehragi ko dekh kar main bhi apne aap se kal shab yaqinan Dar gayaa raat bhar kartaa rahaa sevaa kunvaare jism ki subh ki pahli kiran ke saath vo mandir gayaa meri saanson mein rahaa sajda-numaa raushan koi main jab apne aap ko le kar mukammal ghar gayaa har taraf phaili hui thi tirgi 'saajid-hamid’ kaun chehraa thaa jo aankhon mein sitaare bhar gayaa"

"zahr mein Duubi hui surkh hikaayaat mein gum dil girafta hai havaa mauja-e-asvaat mein gum munkashif hotaa huaa lamha-e-maazi kaa nishaan aankh jhapki thi huaa dud-e-kharaabaat mein gum shaam ki saaat-e-avval mein falak par jaa kar ham ne dekhaa hai samundar ko khayaalaat mein gum unghti raat ke maathe pe chamakti bindiyaa dekh kar ho gai nadiyaa bhi savaalaat mein gum vo jo ik lamha-e-hairaan thaa subuk-rau tanhaa ho gayaa hai tiri aankhon ke tilismaat mein gum muskuraataa pas-e-tasvir thaa shaaista samaan jaane kyuun ho gayaa naadida mahaakaat mein gum vo qarina jise sadiyon ne kiyaa hai paidaa phir na ho jaae kahin shorish-e-jazbaat mein gum Dhal gayaa kaise larazte hue taaron mein hamid jo thaa aansu miri palkon pe mudaaraat mein gum"

"qarib-e-vasl koi haadsa na ho jaae kahin badan ki tamaazat fanaa na ho jaae yahi hai khauf ki tujh paas ho ke bhi meri ragon kaa surkh lahu mushtaba na ho jaae jibillaton kaa taqaazaa ki tujh ko pahnein ham magar vo zakhm-e-tamannaa haraa na ho jaae khile hain phuul sitaaron ke khush-gavaar hai rut qarib aao ki mausam khafaa na ho jaae lahu mein tairti angDaaiyon se bair na kar shab-e-visaal junun saaneha na ho jaae taraashne mein sukun thaa magar main Dartaa huun kahin ye aks-e-shagufta khudaa na ho jaae"

"meri aankhon mein nuur bhar denaa chaahe phir chuur chuur kar denaa aashiyaana banaa rahaa huun main rizq denaa to shaakh par denaa fitrat-e-dahr kaa bharam rah jaae dil ki nadiyaa ko ik bhanvar denaa tanhaa tanhaa bataa kaTe kyuun kar gar safar de to ham-safar denaa kitni maayusiyaan hain lahraai zindagi ko nai sahar denaa aag bhaDkegi zahr utregaa husn ko ishq ki nazar denaa"

"nazar ko tiir kar ke raushni ko dekhne kaa saliqa hai hamein bhi zindagi ko dekhne kaa kisi jalte hue lamhe pe apne honT rakh do agar hai shauq jaamid khaamushi ko dekhne kaa samaaat mein khanakti raushni se ho gayaa hai do-baalaa lutf miTTi ki nami ko dekhne kaa na jaane lauT kar kab aaegaa mausam khajista tiri aankhon ki shaaista hansi ko dekhne kaa sunaa hai shauq thaa un ko hunar aataa nahin thaa sunahre zehn ki vaaraftagi ko dekhne kaa yaqin aataa nahin lekin milaa thaa ek mauqa shagufta shahr ki be-manzari ko dekhne kaa baDaa armaan thaa 'saajid' tumhein kyaa Dar gae kyaa shab-e-taabaan havaa ki khud-kushi ko dekhne kaa"

"main chaahtaa huun ki har shai yahaan sanvar jaae tumhaari ruuh miri ruuh mein utar jaae vo ik khayaal jo thoDaa malaal jaisaa hai tire qarib se guzre agar nikhar jaae dahak rahaa hai jo mujh mein alaav barson se zaraa saa aankh mein bhar le koi to mar jaae zamaane-bhar se vo begaana ho hi jaaegaa koi hayaat ki maanind jab mukar jaae vo ek khvaab jise gungunaataa rahtaa huun kabhi to aa ke miri aankh mein Thahar jaae phir us ke baad main sochungaa apne hone kaa jo darmiyaan hai lamha zaraa nithar jaae kabhi hamid bulaae kabhi use 'saajid' akelaa chaand bataao kidhar kidhar jaae"

"dard itnaa bhi nahin hai ki chhupaa bhi na sakun bojh aisaa bhi nahin hai ki uThaa bhi na sakun yuun samaai hai in aankhon mein bataa bhi na sakun dil ki divaar pe tasvir sajaa bhi na sakun khairiyat puchhte rahte ho magar haal ye hai us ki aavaaz mein aavaaz milaa bhi na sakun aa mire paas zaraa sun ke bataa kahti hai kyaa dil ki dhaDkan jo sar-e-aam sunaa bhi na sakun jabr dekhaa thaa magar aisaa nahin dekhaa thaa aise pahre hain ki palkein main uThaa bhi na sakun ungliyaan chaak huaa karti thiin pahle 'saajid' ab gae haath ki main haath milaa bhi na sakun"

"aankh se TuuT kar giri thi niind vo jo madhosh ho chuki thi niind meri aankhon ke kyuun jharoke tak aa ke chup-chaap si khaDi thi niind kis ne chheDaa havaa ke lahje mein kaisi khaamosh si paDi thi niind niili aankhon ki kar rahaa thaa main jab tilaavat to jal gai thi niind kitni pur-lutf thiin miri raatein un dinon jab hari-bhari thi niind chaand mere sirhaane baiThaa thaa aur baghal mein khaDi hui thi niind jab talak main kivaaD kartaa band 'saajid' mujh duur jaa chuki thi niind"