chand peDon ko hi majnun ki duaa hoti hai — Ahmad Kamran

raas aaegi mohabbat us ko
jis se hote nahin vaade puure

ik pal kaa tavaqquf bhi giraan-baar hai tujh par
aur ham ki thake-haare masaafat se gurezaan

chaahiye hai mujhe inkaar-e-mohabbat mire dost
lekin is mein tiraa inkaar nahin chaahiye hai

miri vafaa hai mire munh pe haath rakkhe hue
tu sochtaa hai ki kuchh bhi nahin samajhtaa main

mujh pe tasvir lagaa di gai hai
kyaa main divaar dikhaai diyaa huun

tu ne ai ishq ye sochaa ki tiraa kyaa hogaa
tere sar se main agar haath uThaa letaa huun

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

sikhaa na duaaon mein qanaaat kaa saliqa
vo maang rahaa huun jo muqaddar mein nahin hai

abr barse to inaayat us ki
shaakh to sirf duaa karti hai

main bhalaa haath duaaon ko uThaataa kaise
us ne chhoDi hi nahin koi zarurat baaqi

khaDaa huun der se main arz-e-muddaaa ke liye
idhar bhi ek nazar kijiye khudaa ke liye