kyaa musibat haath khaali jaaegi — Ahmad Mahfuz

daaman ko zaraa jhaTak to dekho
duniyaa hai kuchh aur shai nahin hai

dil ne lagaa diyaa hai jo ik kaam se mujhe
har dam laDaai rahti hai aaraam se mujhe

jaantaa huun in dinon kaisaa hai dariyaa kaa mizaaj
is liye saahil se thoDaa faasla rakhtaa huun main

apne hi aks kaa chakkar to nahin chaaron taraf
ki nazar aate hain ab khud ko hamin chaaron taraf

zehn par zor bhi Daalo to na yaad aauun main
is tarah parda-e-nisyaan mein chhupaa lo mujh ko

zakhmon ko ashk-e-khun se sairaab kar rahaa huun
ab aur bhi tumhaaraa chehra khilaa rahegaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

jaane kis kirdaar ki kaai mere ghar mein aa pahunchi
ab to 'zafar' chalnaa hai mushkil aangan ki chiknaai mein

ik nadi mein saikDon dariyaa ki tughyaani mili
Dubne vaale ko mar jaane ki aasaani mili