us shakhs ko balaa ki mohabbat thi mujh se dost — Ahtamam Sadiq

vo shakhs yaadon kaa mujh ko ghulaam karte hue
gayaa bhi to miri nindein haraam karte hue

hadd-e-nazar tak ek dariche se aaj phir
main jaa rahaa thaa aur koi dekhtaa rahaa

ab apnaa intizaar rahegaa tamaam-umr
ik shakhs thaa jo mujh se judaa kar gayaa mujhe

musalsal sochte rahte hain tum ko
tumhein jiine ki aadat ho gai hai

so apne shahr ke raunaq ki khair maangnaa tum
main apne gaanv se ik shaam le ke aa rahaa huun

ab ibaadat mein bhi aa jaate ho lab par mere
itnaa paDhtaa huun tumhein hijr ke lamhon mein ki bas

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

dil mein na ho jurat to mohabbat nahin milti
khairaat mein itni baDi daulat nahin milti

dosti ishq aur vafaadaari
sakht jaan mein bhi narm goshe hain

kaf-e-afsos malne se bhalaa ab faaeda kyaa hai
dil-e-raahat-talab kyuun ham na kahte the ye duniyaa hai

ishq ho jaaegaa meri daastaan-e-ishq se
raat bhar jaagaa karoge is kahaani ke liye