zaraa yaadon ke hi patthar uchhaalo — Akhtar Shahjahanpuri

dilon mein karb baDhtaa jaa rahaa hai
magar chehre abhi shaadaab se hain

abhi tahzib kaa nauha na likhnaa
abhi kuchh log urdu bolte hain

ye moajiza hamaare hi tarz-e-bayaan kaa thaa
us ne vo sun liyaa thaa jo ham ne kahaa na thaa

apnon se jang hai to bhale haar jaaun main
lekin main apne saath sipaahi na laaungaa

koi manzar nahin barsaat ke mausam mein bhi
us ki zulfon se phisalti hui dhupon jaisaa

ranj-o-gham sahne ki aadat ho gai hai
zinda rahne ke saliqe de gayaa vo

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

bahaarein ham ko bhulin yaad itnaa hai ki gulshan mein
garebaan chaak karne kaa bhi ik hangaam aayaa thaa

dil dhaDakne kaa sabab yaad aayaa
vo tiri yaad thi ab yaad aayaa

ye haqiqat hai ki ahbaab ko ham
yaad hi kab the jo ab yaad nahin

rulaaegi miri yaad un ko muddaton saahab
kareinge bazm mein mahsus jab kami meri