har khushi dil se kyuun lagaa baiThein — Amar Singh Figar

bhule se aa gayaa huun farishton ke des mein
kis se pata karun ki yahaan fard kaun hai

bhiig jaane par bhi jo bujhtaa na thaa
aaj vo shoala dhuaan hone ko hai

machalti shokh maujon ko main apne naam kyuun likkhun
ki aakhir khushk hogaa mausam-e-barsaat kaa dariyaa

tu ye na puchh mire gaanv mein hain ghar kitne
ye puchh kaun se ghar mein azaab kitne hain

josh-e-takmil-e-tamannaa hai khudaa khair kare
khaak hone kaa andesha hai khudaa khair kare

phuul to kyaa khaar bhi manzur hain
be-rukhi se yuun magar pheinko nahin

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

apni tanhaai ko aabaad to kar sakte hain
ham tujhe mil na sakein yaad to kar sakte hain

is bulandi pe bahut tanhaa huun
kaash main sab ke baraabar hotaa

umr-bhar ko mujhe be-sadaa kar gayaa
teraa ik baar munh pher kar bolnaa