masjid mein bulaate hain hamein zaahid-e-naa-fahm — Ameer Minai

kaun si jaa hai jahaan jalva-e-maashuq nahin
shauq-e-didaar agar hai to nazar paidaa kar

aafat to hai vo naaz bhi andaaz bhi lekin
martaa huun main jis par vo adaa aur hi kuchh hai

maani hain main ne saikaDon baatein tamaam umr
aaj aap ek baat miri maan jaaiye

vo dushmani se dekhte hain dekhte to hain
main shaad huun ki huun to kisi ki nigaah mein

khudaa ne nek surat di to sikho nek baatein bhi
bure hote ho achchhe ho ke ye kyaa bad-zabaani hai

tum ko aataa hai pyaar par ghussa
mujh ko ghusse pe pyaar aataa hai

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

namaaz shukr ki paDhtaa hai jaam toD ke shaikh
vuzu ke vaaste letaa hai aabru-e-sharaab

khaate hain angur piite hain sharaab
bas yahi maston kaa aab-o-daana hai

abhi aaghaaz-e-mohabbat hai kuchh is kaa anjaam
tujh ko maalum hai ai dida-e-nam kyaa hogaa

khaaveinge Taanke zakhm-e-sar-o-ru par ai tabib
par zakhm-e-dil to ham se silaayaa na jaaegaa