tum ko aataa hai pyaar par ghussa — Ameer Minai

aafat to hai vo naaz bhi andaaz bhi lekin
martaa huun main jis par vo adaa aur hi kuchh hai

maani hain main ne saikaDon baatein tamaam umr
aaj aap ek baat miri maan jaaiye

vo dushmani se dekhte hain dekhte to hain
main shaad huun ki huun to kisi ki nigaah mein

khudaa ne nek surat di to sikho nek baatein bhi
bure hote ho achchhe ho ke ye kyaa bad-zabaani hai

masjid mein bulaate hain hamein zaahid-e-naa-fahm
hotaa kuchh agar hosh to mai-khaane na jaate

kaun si jaa hai jahaan jalva-e-maashuq nahin
shauq-e-didaar agar hai to nazar paidaa kar

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

mazhab-e-ishq-o-vafaa mujh ko ye detaa hai salaah
tu jo kaafir nahin hotaa to musalmaan bhi na ho

chaahiye thi shama is taarik ghar ke vaaste
khaana-e-dil mein charaagh-e-ishq raushan ho gayaa

ho mohabbat ki khabar kuchh to khabar phir kyuun ho
ye bhi ik be-khabari hai ki khabar rakhte hain