'ishq vaqt-e-digar pe kyon chhoDein — Anjum Farooq

ab tiraa rasta judaa meraa judaa
dekh qismat kaa likhaa hote hue

saahabo main ne taraashe nahin patthar ke sanam
mere haathon se banaa aur banaa ek hi shakhs

jahaan tak ho sake khud ko bachaa badnaam hone se
mohabbat khatm hoti hai mohabbat 'aam hone se

bahut achchhaa bahut achchhaa bahut achchhaa hai tu lekin
tujhe koi kahe achchhaa mujhe achchhaa nahin lagtaa

bas itnaa saa hai khulaasa miri kahaani kaa
ki ibtidaa tiri aankhein hain intihaa miraa 'ishq

is liye kashkol mein paDti hai bhiik
ham ne hai laaThi se laTkaayaa huaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ghussa aataa hai pyaar aataa hai
ghair ke ghar se yaar aataa hai

urdu mein baat kijiye urdu mein boliye
haq hai zabaan kaa pyaar kaa ras is mein gholiye

ishq ki choT kaa kuchh dil pe asar ho to sahi
dard kam ho yaa ziyaada ho magar ho to sahi

biich dariyaa mein utar kar dekhiye
'ishq-dariyaa mein kinaare kuchh nahin