ishq to har shakhs kartaa hai 'shuur' — Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

miri hayaat hai bas raat ke andhere tak
mujhe havaa se bachaae rakho savere tak

divaar-e-zindaan ke pichhe
jurm-e-mohabbat mein baiThaa huun

kabhi rotaa thaa us ko yaad kar ke
ab aksar be-sabab rone lagaa huun

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

'shuur' sirf iraade se kuchh nahin hotaa
amal hai shart iraade sabhi ke hote hain

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

vafaa to kaisi jafaa bhi nahin hai ab ham par
ab itnaa sakht mohabbat se intiqaam na le

aankh nam rukh par udaasi dard bhi dil ke qarib
kyaa mohabbat aa gai hai apni manzil ke qarib

'mir'-o-'ghaalib' bhi rahe ishq mein sarshaar miyaan
ab bhi fankaaron ke jiine kaa sahaaraa hai yahi

bajaT ki kai sakhtiyaan aur bhi hain
''abhi ishq ke imtihaan aur bhi hain''