bikhar ke TuuT gae ham bikharti duniyaa mein — Anwar Siddiqui

ujaalti nahin ab mujh ko koi taariki
sanvaartaa nahin ab koi haadsa mujh ko

Duboe detaa hai khud-aagahi kaa baar mujhe
main Dhaltaa nashsha huun mauj-e-tarab ubhaar mujhe

saari shafaq sameT ke suraj chalaa gayaa
ab kyaa rahaa hai mauj-e-shab-e-taar ke sivaa

kitne subuk-dil hue tujh se bichhaDne ke baad
un se bhi milnaa paDaa jin se mohabbat na thi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

aur bhi to hain zamaane mein tumhaare aashiq
ek main hi tumhein kyaa qaabil-e-ilzaam milaa