rokaa thaa dam bhar lahraataa aansu — Arzoo Lakhnavi

nazar bachaa ke jo aansu kiye the main ne paak
khabar na thi yahi dhabbe baneinge daaman ke

khizaan kaa bhes banaa kar bahaar ne maaraa
mujhe do-rangi-e-lail-o-nahaar ne maaraa

aap apne se barhami kaisi
main nahin koi aur hai ye bhi

phir chaahe to na aanaa o aan baan vaale
jhuTaa hi vaada kar le sachchi zabaan vaale

hasraton kaa dil se qabza uTh gayaa
ghaasibon ki hukmraani khatm hai

jazb-e-nigaah-e-shoabada-gar dekhte rahe
duniyaa unhin ki thi vo jidhar dekhe rahe

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

gham-e-hayaat ne aavaara kar diyaa varna
thi aarzu ki tire dar pe subh o shaam karein

us shakhs ke gham kaa koi andaaza lagaae
jis ko kabhi rote hue dekhaa na kisi ne

ajiib dard kaa rishta hai saari duniyaa mein
kahin ho jaltaa makaan apnaa ghar lage hai mujhe