koi to dekhe miri bebasi mohabbat mein — Asad Awan

'ghaalib' ke martabe se ye vaaqif nahin 'asad'
ye bad-lihaaz nasl hai ahd-e-jadid ki

subut aaj bhi meri kitaab mein hai 'asad'
vo ek ruqa tiraa tere dastakhat ke saath

jo apne zo'm mein rahte hain aise logon ko
nazar mein rakhte hain dil se utaar dete hain

guzar na jaae ye mausam basant kaa mausam
banafsha phuul khile har taraf zamin ke liye

zaakir-e-aal-e-mohammad hai tu mimbar pe 'asad'
ibn-e-marjaana ke jaisaa ye labaada kaisaa

ik nai tarz kaa kirdaar diyaa jaaegaa
is kahaani mein mujhe maar diyaa jaaegaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

mohabbat phuul banne par lagi thi
palaT kar phir kali kar li hai main ne

ishq ki choT kaa kuchh dil pe asar ho to sahi
dard kam ho yaa ziyaada ho magar ho to sahi

biich dariyaa mein utar kar dekhiye
'ishq-dariyaa mein kinaare kuchh nahin