miri yaadon mein taDpoge ye vaa'da main nahin kartaa — Asad Bijnori Alig

jis bulandi se tu bhi na aae nazar
aisi shohrat ki ai maan du'aaein na de

ham pe ye raaz khulaa bhi to bahut der ke baa'd
asl kirdaar kahaani mein kisi aur kaa hai

paDe hain phike ye chaand taare bhi is ke aage
kahaan se laai ho tum ye husn-o-jamaal laDki

us kaa ham se baat karnaa yaad karnaa pyaar karnaa
ik ghalat-fahmi thi jo ab duur hoti jaa rahi hai

bulandiyon par zaraa takabbur se duur rahnaa
vagarna ye hi banegaa vajh-e-zavaal laDki

milaa hai husn to is par ghurur itnaa nahin achchhaa
milaa detaa hai miTTi mein khudaa maghrur chehron ko

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi