jal rahaa hai jo lab-e-baam abhi ek charaagh — Asim Nadeem Asi

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

hamaaraa jism to phir jism Thahraa
daraaDein aib hain divaar mein bhi

tapte sahraa khuun piyeinge chaDhtaa suraj Dhal jaaegaa
baiThi hui hai jis mein sakina aaj vo khema jal jaaegaa

zamin ke maalik-o-mukhtaar ki sunnat samajh kar
khaDaavein pahn liin aur bakriyaan rakkhi hui hain

hamaari kaarobaari zindagi kaa kul asaasa
ye kuchh sikke hain aur kuchh parchiyaan rakkhi hui hain

dost-daari ke saliqe se bahut vaaqif huun
ab mujhe haath milaane kaa hunar aataa hai

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

us ko sochun to dhyaan mein mere
khushbu aati hai pahli baarish ki

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi