vo ik sukhan hi hamaari sanad na ban jaae — Ata Turab

kyaa kyaa na pyaas jaage mire dil ke dasht mein
hasrat bhi ek aag hai laage jo raat bhar

chaahiye kyaa tumhein tohfe mein bataa do varna
ham to baazaar ke baazaar uThaa laaeinge

haan tujhe bhi to mayassar nahin tujh saa koi
hai tiraa arsh bhi viraan mire pahlu ki tarah

ishq to apne lahu mein hi sanvartaa hai so ham
kis liye rukh pe koi ghaaza lagaa kar dekhein

tufaan-e-bahr khaak Daraataa mujhe 'turaab'
us se baDaa bhanvar to safine ke biich thaa

yuun mohabbat se na ham khaana-ba-doshon ko bulaa
itne saada hain ki ghar-baar uThaa laaeinge

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge