kise fursat ki farz-e-khidmat-e-ulfat bajaa laae — Azad Ansari

vo kaafir-nigaahein khudaa ki panaah
jidhar phir gaiin faisla ho gayaa

ham ko na mil sakaa to faqat ik sukun-e-dil
ai zindagi vagarna zamaane mein kyaa na thaa

didaar ki talab ke tariqon se be-khabar
didaar ki talab hai to pahle nigaah maang

afsos be-shumaar sukhan-haa-e-guftani
khauf-e-fasaad-e-khalq se naa-gufta rah gae

sazaaein to har haal mein laazmi thiin
khataaein na kar ke pashemaaniyaan hain

banda-parvar main vo banda huun ki bahr-e-bandagi
jis ke aage sar jhukaa dungaa khudaa ho jaaegaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ai soz-e-ishq-e-pinhaan ab qissa mukhtasar hai
iksir ho chalaa huun ik aanch ki kasar hai

jab ye jism sulagtaa hai to ruuh bhi jalne lagti hai
parvaane kaa ishq mukammal hotaa hai jal jaane mein

tere shaidaa bhi hue ishq-e-tamaashaa bhi hue
tere divaane tire shahr mein rusvaa bhi hue

mujh se ai dost phir khafaa ho jaa
ishq ko niind aai jaati hai