gilaa bhi tujh se bahut hai magar mohabbat bhi — Basir Sultan Kazmi

jab bhi mile ham un se unhon ne yahi kahaa
bas aaj aane vaale the ham aap ki taraf

dil lagaa lete hain ahl-e-dil vatan koi bhi ho
phuul ko khilne se matlab hai chaman koi bhi ho

kuchh to hassaas ham ziyaada hain
kuchh vo barham ziyaada hotaa hai

'baasir' tumhein yahaan kaa abhi tajraba nahin
bimaar ho? paDe raho, mar bhi gae to kyaa

ruk gayaa haath tiraa kyuun 'baasir'
koi kaanTaa to na thaa phulon mein

kaise yaad rahi tujh ko
meri ik chhoTi si bhuul

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sabhi se jab mohabbat chaahte ho
mohabbat kyon nahin karte sabhi se

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa