gardish-e-bakht se baDhti hi chali jaati hain — Bekhud Badayuni

shikva sun kar jo mizaaj-e-but-e-bad-khu badlaa
ham ne bhi saath hi taqrir kaa pahlu badlaa

khuun ho jaaein khaak mein mil jaaein
hazrat-e-dil se kuchh baiid nahin

vo un kaa vasl mein ye kah ke muskuraa denaa
tulu-e-subh se pahle hamein jagaa denaa

vo jo kar rahe hain bajaa kar rahe hain
ye jo ho rahaa hai bajaa ho rahaa hai

shifaa kyaa ho nahin sakti hamein lekin nahin hoti
davaa kyaa kar nahin sakte hain ham lekin nahin karte

apni khu-e-vafaa se Dartaa huun
aashiqi bandagi na ho jaae

main baDaa ho gayaa huun magar bachpanaa
mere dil se kabhi bhi gayaa hi nahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

main badalte hue haalaat mein Dhal jaataa huun
dekhne vaale adaakaar samajhte hain mujhe

dil-e-haris hi apnaa na ho sakaa qaane
vagarna tere karam mein to kuchh kami na rahi