apni khu-e-vafaa se Dartaa huun — Bekhud Badayuni

shikva sun kar jo mizaaj-e-but-e-bad-khu badlaa
ham ne bhi saath hi taqrir kaa pahlu badlaa

khuun ho jaaein khaak mein mil jaaein
hazrat-e-dil se kuchh baiid nahin

vo un kaa vasl mein ye kah ke muskuraa denaa
tulu-e-subh se pahle hamein jagaa denaa

vo jo kar rahe hain bajaa kar rahe hain
ye jo ho rahaa hai bajaa ho rahaa hai

shifaa kyaa ho nahin sakti hamein lekin nahin hoti
davaa kyaa kar nahin sakte hain ham lekin nahin karte

gardish-e-bakht se baDhti hi chali jaati hain
miri dil-bastagiyaan zulf-e-girah-gir ke saath

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

husn jalva dikhaa gayaa apnaa
ishq baiThaa rahaa udaas kahin

sau fasaad ek ishq mein uTThe
boyaa ik tukhm uge hazaar darakht