kitnaa aasaan thaa bachpan mein sulaanaa ham ko — Bharat Bhushan Pant

sabab khaamoshiyon kaa main nahin thaa
mire ghar mein sabhi kam bolte the

ham saraabon mein hue daakhil to ye ham par khulaa
tishnagi sab mein thi lekin tishnagi mein kaun thaa

hamaari baat kisi ki samajh mein kyuun aati
khud apni baat ko kitnaa samajh rahe hain ham

main thoDi der bhi aankhon ko apni band kar luun to
andheron mein mujhe ik raushni mahsus hoti hai

hamaare haal pe ab chhoD de hamein duniyaa
ye baar baar hamein kyuun bataanaa paDtaa hai

ghar se nikal kar jaataa huun main roz kahaan
ik din apnaa pichhaa kar ke dekhaa jaae

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

ghurur bhi jo karun main to aajizi ho jaae
khudi mein lutf vo aae ki be-khudi ho jaae

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai