dohraai jaa sakegi na ab daastaan-e-ishq — Bismil Saeedi

husn bhi kambakht kab khaali hai soz-e-ishq se
shama bhi to raat bhar jalti hai parvaane ke saath

tum jab aate ho to jaane ke liye aate ho
ab jo aa kar tumhein jaanaa ho to aanaa bhi nahin

sukun nasib huaa ho kabhi jo tere baghair
khudaa kare ki mujhe tu kabhi nasib na ho

ro rahaa huun aaj main saare jahaan ke saamne
roegaa kal dekhnaa saaraa jahaan mere liye

kisi ke sitam is qadar yaad aae
zabaan thak gai mehrbaan kahte kahte

kaabe mein musalmaan ko kah dete hain kaafir
but-khaane mein kaafir ko bhi kaafar nahin kahte

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

tumhaaraa naam liyaa thaa kabhi mohabbat se
miThaas us ki abhi tak miri zabaan mein hai