yaad thaa 'suqraat' kaa qissa sabhi ko 'ehtiraam' — Ehteram Islam

ahl-e-duniyaa se mujhe to koi andesha na thaa
naam teraa kis liye mire labon par jam gayaa

laDkhaDaa kar gir paDi unchi imaarat dafatan
dafatan taamir ki kursi pe khanDar jam gayaa

saath rakhiye kaam aaegaa bahut naam-e-khudaa
khauf gar jaagaa to phir kis ko sadaa di jaaegi

is baar bhi shoalon ne machaa Daali tabaahi
is baar bhi shoalon ko havaa di gai shaayad

tauqir andheron ki baDhaa di gai shaayad
ik shama jo raushan thi bujhaa di gai shaayad

usi se mujh ko milaa ishtiyaaq manzil kaa
mire safar ko fazaa-e-safar usi se mili

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

gulaabon ke honTon pe lab rakh rahaa huun
use der tak sochnaa chaahtaa huun

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

vo ajab ghaDi thi main jis ghaDi liyaa dars nuskha-e-ishq kaa
ki kitaab aql ki taaq par juun dhari thi tyuun hi dhari rahi